Aizawl: Central YMA leh Formosa Foundation tangkawp buatsaih oxygen concentrator 500 inhlanna Inrinni khan Vana Pa Hall-ah neih a ni a, Chief Minister Lalduhoma chuan khuallian niin a hmanpui a. Lt. Gen. Vikas Lakhera, DG, Assam Rifles chu khualzahawm a ni.
Central YMA Vice President Prof. Lalnuntluanga kaihhruai inkhawmah hian chief minister Lalduhoma chuan Formosa Foundation leh Central YMA te hmalakna chu fakawm a tih thu sawiin, Central YMA leh Formosa Foundation ten a mamawhte tana oxygen concentrator 500 zet mai YMA branch leh tlawmngai pawl hrang hrangte hnena hlanna hun pawimawh tak a buatsaih chu lawmawm a tih thu a sawi a. “Damlo oxygen mamawh ten tangkai taka an hman theih tur, nun chhanhimna hmanraw pawimawh tak mai, a mamawh ten an ban phak tura ruahmanna siam a ni hi a hluin, midangte tana malsawmna a ni a, a Pathian thu hle a ni,” a ti.
Chief minister chuan Formosa Foundation hian an hriat angin ram leh mipuite tan, kawng hrang hrangin, thahnemngai takin hma an lo la tawh thin a, Mizo mipui tana theihtawp chhuah a, malsawmna thlentu an nih fo thin angin, vawiinah midangte tan an luang chhuak leh ta hi fakawm a tih thu sawiin, an hnathawh a ropui a tih thu a sawi bawk.
Hriselna lam hmalakna mai piah lamah, chief minister chuan ram tihmelhemtu, ruihhlo lakah Central YMA hotute hma la zel turin a chah a. Ruihhlo nena indonaah hian tha thlah mai lova, thawk zui zel turin kalkhawmte a fuih thar bawk.
He hunah hian oxygen concentrator hi YMA branch 473 leh pawl dang 27, a vaiin 500 sem a ni.