Aizawl: Mizoram Public Service Commission (MPSC)-in AH&Vety department hnuaia Jr. Grade of MAH&VS hna a laknaah thil fel lo a awm ngei nia hriat a nih avangin, he recruitment process zawng zawng hi May 29, 2026 hma ngeia a bul atanga tan thar leh turin Mizo Zirlai Pawl (MZP) chuan MPSC thuneitute an phut.
Inrinni khan Aizawl Press Club-ah thu thar thehdarhtute kawmin MZP hruaitute chuan he hna lak chungchangah hian MPSC Controller of Examination-in thu dik tawk lo a hrilh niin an sawi a. MZP President Dr. C. Lalremruata sawi danin, he hna diltu zinga mi 101-te chu October 24, 2025 khan MPSC hian ‘valid list’-ah tar langin chung zinga mi 74-te chuan written exam an hmachhawn a. Mahse, April 27, 2026-a written result chhuakah post li lak tur ni siin mi pathum chauh tihtlin an ni a, a chhan chu exam hmachhawn zinga mi 71-ten MPSC online portal-ah Veterinary Council Registration Certificate an upload loh vang tih MPSC chuan an sawi.
MZP-in a hnua a zirchiannaah erawh candidate-ten online form an fill-up lai hian certificate upload-na tur ‘option/slot’ emaw ‘Others’ tih thlan tur emaw a awm miah lo tih hriat a ni a. Hei hi MPSC portal technical problem leh management fel tawk loh vang liau liau a nih avangin exam hmachhawn mi 71-te hi tihsual vanga tawrhtir chi an ni lo tiin MZP chuan an sawi.
MZP President chuan tun hnaiah MPSC hi hna lak kalpui tawh leh kalpui mekah an tal buai nasain tihsual an ngah hle tih a sawi a, sorkar pawh MPSC thuam chak turin an ngen nghal bawk.