Zaithiam Jessie J chuan hun rei tak hnute cancer avanga a buai hnuah hnehna puangin, a taksa chu cancer in a chhuahsan thu leh, cancer chu lak bo a nih tak thu a sawi.
May 21 khan Jessie hian a IG lamah a thlalak leh video tawite dahchhuakin, a hriselna dinhmun enfiah laite a ni nual a, a in checkup hnuhnung berte pawh a dah tel bawk.
Kum 38 mi zaithiam chuan hnute cancer avanga hun rei tak a buaina chu enkawlna tha taka a lak leh a dawn avanga lak bo a nih tak thu sawiin, a hlim thu a sawi a ni.
Jessie J (a hming dik tak Jessica Cornish) hian kum 2025 June thla khan a album thar ber ‘Don’t Tease Me with a Good Time’ promote a vah kual laiin hnute cancer a vei thu hi a puang thut mai a, fan tam tak a barakhaih hle a nih kha.
Hemi hnu hian enkawlna tha tak dawng zuiin, amah pawh a inuluk chho hle a, doctor te thusawi tha tak zawmin, a damna tur a ngaihtuah nasa zui hle niin a sawi a, cancer natna chu hneh theih a nih thu a sawizui nasa hle a ni.
Kumin January thla khan ‘No Secret Tour’ neiin, hetah hian dam lam a pan zel thu leh inenkawlna kawngah duhthusam a dawn bakah, zawm ngai a zawm tha hle niin a sawi a, tunah chuan a treatment lak hnuhnung ber thlalak pholang chungin, cancer natna a hneh tak thu a rawn puang ta a ni.