Myanmar sipaite chuan ramri bial eng emaw zatah beihpui an thlak thar leh a, heng zingah hian leilung hausakna thil vâng chi awmna hmun leh sumdawnna kawng pawimawh dang awmna pawh a tel a. Tual chhung buaina awmna rama sorkar kengkawhtu thar a awm hnu thla khatah hma hi an la thar a ni.
Sipai hotu thar, Ye Win Oo chuan March thla khan a hun rei tak president lo ni tawh a bân hnuah thuneihna a chang a, tun hnaia hnam sipaiten an chhuhsak ramria an inkulhna hmunte lak let leh tumin hma a la mek niin hel pawl thupuangtu leh mi thiamten Reuters an hrilh.
Tun hnaia sipaite beihpui thlaknaah hian China nena inzawm, leilung hausakna vâng chi tamna, Kachin State bakah India ramria Chin State leh Thailand bula Karen State-a sumdawnna kawng pawimawh awmna a tel.
Kar hmasaa an thutkhawmnaah Ye Win Oo-a chuan sipaite hnenah Chin State-a Falam khawpui leh Kachin State-a Mandalay leh Myitkyina inkar kawngpui an venhim thu a sawi niin sorkar enkawl, Global New Light of Myanmar chanchinbuin a tar lang.
Myanmar analyst Sai Kyi Zin Soe chuan, “Sipaite tan hian Myanmar-a an inkalpawhna pui leh sumdawnna kawngpui pawimawhte an thunun leh a ngai a ni,” a ti.
“Ramria sumdawnna kawng awmna khawpuite chu lak let leh tumin an bei tih kan hmu thei a ni,” a ti.
Myanmar hmun hrang hranga sipaite beihna leh an hlawhtlinna hrang hrang sawite chu anmahni sawi bak finfiah theih a la ni rih lo va, heng hmunah hian chanchinbu mite luh khap a la ni reng.
Beihpui thlakna thar hi thla hmasaa sipai chief hlui, president ni ta, Min Aung Hlaing-a’n sipai dodaltu pawlte chu ni 100 chhunga remna zawnga inbiakna nei tura a ngen hnua tih a ni a. President ngenna hi hnam sipai tam takin an hnawl a ni.
Myanmar-a buaina chhuak mek hi kum 2021 atanga chhuak a ni a, sipaiten sorkar an paih thla a, Aung San Suu Kyi-i kaihhruai mipui sorkar chu an paih thla a ni.
Sipaite chetna hian ram pum huapa helna a thlen a, ralthuam kenga dodalna a tam hle a, hnam hrang hrang sipai leh hel pawl hrang hrangte chuan sipaite chu hmun engemaw zat atangin an hnawtchhuak tawh a ni.