Mizoram Mixed Martial Arts Association (MISMA) buatsaih MISMA Fight Night chu Chief Minister Lalduhoma chuan khuallian niin a hmanpui.
Inrinni zana R. Dengthuama Indoor Stadium, Mualpui-ah MISMA Fight Night buatsaih hi Asia chhimchhak atanga Ultimate Fighting Championship (UFC) champion hmasa ber leh champion lai, Joshua Van-a’n a telpui bawk.
He hunah chief minister chuan Asia chhimchhak atanga UFC champion hmasa ber, Joshua ‘The Fearless’ Van chawimawi a ni chu Zoram mipui tan chhinchhiah tlak tak a nih thu a sawi a. Mizote, Chin leh Kuki-te hi hnam pakhat leh chhungkua pakhat niin, inzawmna leh unauna tha neih a pawimawhzia a sawi a. Van-a hlawhtlinna hian Mizo thalaite chu tum sang zawk neih theihna leh huai taka khawvel hmachhawn ngam zel turin a fuih, a ti.
Sports Minister Lalnghinglova Hmar pawhin thu sawiin Mizorama boxing leh contact sports hrang hrang ‘Centre of Excellence’ sakna tur Rs vbc 38 chu Ministry of DoNER hnuaia ‘North East Special Infrastructure Development Scheme – Other Than Roads Infrastructure (NESIDS-OTRI)’ atangin approval an hmuh tawh thu chu sawiin, lawmawm a tih thu a sawi.
Fight Night-ah hian IPRP&S Minister B. Lalchhanzova, RD&AD Minister Prof. Lalnilawma, Deputy Speaker Lalfamkima bakah MLA leh sorkar hotu lu te, Central YMA hruaitute leh International MMA Federation atangin mi eng emaw zat an tel a ni.