Aizawl: Union Minister of Power leh Housing and Urban Affairs Manohar Lal Khattar chuan Inrinni khan BJP Mizoram State Office a tlawh a, BJP Mizoram hruaitute nen Mizoram mamawh leh hmasawnna hna hrang hrang an thawhpui chungchang an sawi ho.
BJP Mizoram State President Dr. K. Beichhua, MLA kaihhruaina hnuaia an inkawmnaah hian, State President hian Mizoram dinhmun hrang hrang leh mipui mamawh central hmalakna te a lo zawt a, a department chan hrang hrang laka hmasawnna tur te a thlen nghal bawk.
Power Department chungchanga sum la pek chhuak loh thu an sawipui chu Union Minister chuan, tunah hian sorkar laipui atangin Mizoram tan Rs vbc 6 pek chhuak tur a awm reng tawh thu leh, Mizoram sorkar-in matching share Rs vbc 60 an pe thei a nih chuan chawlhkar khat chhunga he sum hi pek chhuak a nih tur thu a sawi a. Deendayal Antyodaya Yojana – National Urban Livelihoods Mission (DAY-NULM) hnuaia contractual-a thawk Mizo tam takte’n harsatna an tawh chungchang an sawipui chu chhangin, thla khat emaw thla hnih hnuah NULM 2.0 chu tan vat a nih tur thu leh heng hnathawktute harsatna pawh a lo ngaihtuahpui tur thu a sawi bawk.
In sak tanpuina installment hmasa ber hmu tawh si, a pahnihna la hmu lo tam tak an awm thu leh, tlinna paltlang vek si tun thlenga la dawng lo te, leh he in sak tanpuina chungchanga BJP member-te’n state sorkar atanga harsatna an tawh thute an sawi chu Manohar Lal Khattar chuan, heng an harsatna leh an duh dante hi ziaka a hnen thlen turin BJP Mizoram hruaitute hi a chah nghal bawk.