Israeli Prime Minister Benjamin Netanyahu-a chuan Iranian-te thlawp, Hezbollah firfiak pawl nena an inbeihnaah Lebanon ram chhungah a sipaite chu lut thuk zel turin a hriattir tih Pathianni khan a sawi a, indonaah hian chawlhkar ruk chuang kalta khan inkahhai puan a lo ni tawh thung.
Lebanon-a indona hi Iran indonain a nghawng chhuahah chuan a nasat ber a ni tawh a, March 2-a Hezbollah-in an thawhpui, Iran thlawp nana Israel-a rocket leh drone a kap tan atang khan Israel-in beihpui a thlakna leh insawn chhuak tura mi chengte thu a pek hmangin Lebanese maktaduai 1.2 chuang hmun himah an tlanchhe tawh.
Lebanese sorkarin a tar lan dan chuan tun thlengin mi 3,370 chuang an thi tawh a. Israel chuan he hun chhung vek hian an sipai 24 leh civil mi pali an thi tawh tih a sawi ve bawk a. Hezbollah-in rocket leh drone hmanga an ram hmar lama an beih avangin Israeli sang tam tak hmun dangah an insawn tawh bawk.
Thil thleng thar berah hian Israeli sipaite hian kum 900 zeta upa, Beaufort Castle leh Lebanon chhim lama tlangdung pawimawh tak an la a. Hei hi April thlaa inkahhai puan a nih hnua Hezbollah-ten Israel hmar lam hawia ralthuam an chelek nasat ber ni, sikul leh veivah pawh khuahkhirh a ngaih phahna ni a thlen tukah a ni tih sipaite chuan an sawi.
Netanyahu-a chuan thuchhuah siamin, “Lebanon-a leia hmalakna tihzau turin (sipaite) chu ka hriattir a ni,” a ti.
Lebanon-a tharum thawhna nasa tak thleng mek chu tar langin France chuan United Nations Security Council chu Thawhtanni khan thutkhawm hmanhmawh neihpui turin a ngen niin an foreign ministry chuan thuchhuah siamin a tar lang.
April thla laihawl vela inkahhai a nih hnuah pawh Israeli sipaite leh Hezbollah hi an inkah chhunzawm zel a. Hezbollah hian kamikaze drone man tlawm, rem khawm awl tak, air defense tana kah thlak harsa tak hmangin Lebanon chhim lamah Israeli sipai eng emaw zat an that bawk.
Israeli sipaite hian Lebanon-a Litani lui thlengin ram an thunun tawh a, hmar lam km 10 vela hla, Zaharani luiah an nawr mek bawk.
Netanyahu-a chuan a tum chu ‘Hezbollah thununna hnuaia awm hmunah thuk zawk leh zau zawka luh’ a nih thu a sawi.
Inthlan lo awm turah Netanyahu-a hmachhawn tur, Naftali Bennett pawhin Lebanon-ah na zawka hmalak a tum thu a sawi a, Beirut dai thlenga beih a tum thu a sawi.
Sipaite chuan Pathianni khan Zaharani chhim lama chengte chu hmun hima insawn chhuak turin thu an pe a. Inrinni zan khan thlawhna hmangin chhim lamlama Deir El Zahrani khua an beihnaah mi pariat an thi niin Lebanon sorkar news agency chuan a sawi bawk.
Pathianni nileng khan Israeli sipaite hi che zuiin Lebanon chhim lamah vawi 40 chuang beihpui an thlak niin Lebanses thuneitute leh sorkar chuan a puang bawk.