National Security Adviser Ajit Doval chuan New Delhi-ah Myanmar President Min Aung Hlaing a kawm a. Tun hi April thlaa Myanmar hruaituin a hna a chelh hnua India a tlawhna hmasa ber a ni.
December leh January thla khan Myanmar-ah hian parliament inthlangin Min Aung Hlaing-a hi president a ni zui a, thla hnih pawh a tlin hmain a thenawm ram hi a tlawh a. Inthlanna hi February, 2021-a sipaiten Aung San Suu Kyi-i kaihhruai mipui sorkar an paih thlak avanga politic-a buaina nasa tak a chhuah hnua neih a ni.
Myanmar hi India thenawm ram pawimawh zinga mi a ni reng a, hmarchhak state eng emaw zat nen ramri km 1,640-a thui an intawm a, Nagaland, Mizoram leh Manipur te pawh an tel a. Prime Minister Narendra Modi-a nen Min Aung Hlaing-a hi Thawhtanni khan thil hrang hrang sawiin an inbe zui bawk.
External affairs ministry thupuangtu, Randhir Jaiswal-a chuan Myanmar hruaituin India a tlawh chhunga sawiho turah hian ramri venhimna, inbiakpawhna leh inpawh tawnna te chu ngaih pawimawh a nih dawn thu a sawi.
Hemi hma hian External Affairs Minister S Jaishankar-a chuan Myanmar president hi a kawm bawk a, ram pahnihte thawhdunna kawng pawimawh tak tak, inpawhna leh sumdawnte a sawipui.
New Delhi-in Neighborhood First policy a kalpui hnuaia Myanmar nena inzawmna tihchak leh venhimna, infrastructure leh chhehvel ramte nena inzawm lama thawhhona tihchak a tumna kawngah president-in tlawh hi thil pawimawh tak a ni.
International Security Forum hmasa ber leh kar liam taa Moscow-a High Representatives for Security Matters Meeting vawi 14-nana Doval-a hian Myanmar National Security Adviser Tin Aung San a lo hmu tawh bawk a. Ram pahnihte hian himna, ram venhimna leh inkalpawhna lama thawhhona kalpui mek an thlir a, an inkara inpawhna tihhmasawnna tur chungchangah pawh an duh dan an inhrilh bawk.
Hetianga sorkar hotu liante inkawm hian India-in Neighborhood First policy hnuaia hmarchhaka a thenawm ramte a hnaih chhunzawm zel dan a tar langa ngaih a ni a. Ramri enkawlna, inkalpawhna leh chhevel himna a ngai pawimawh hle tih a tilang bawka ngaih a ni.
Myanmar NSA hian July thla hian India a tlawh dawn bawk a, Bay of Bengal Initiative for Multi-Sectoral Technical & Economic Cooperation (BIMSTEC)-a National Security Advisers meeting vawi 5-naah a tel dawn a, hei hian ram pahnihte tan thawhhona thuk zawka kalpui theihna hun remchang dang a siamsak leh dawn a ni.