India in a ram chhunga a kalpui mek Special Intensive Revision (SIR) chu Mizoram pumah pawh kalpui mek niin, Booth Level Officer (BLO) ten anmahni huamchhung theuhah intin tlawhchhuakin hma an la tan a, mipui lam pawhin kan lo thawhpui that a tul hle.
SIR hi form awmsa tihkhah mai a nih hmel a, hrethiam lo tan BLO te zawhfiah leh inpuihtir theih reng a ni dawn a, kan ngaih pawimawh a tha hle bawk.
India khua leh tui dik takte chuan SIR hi kan ngaih pawimawh a tul tak zet a, kan khua/veng chhunga awm lo, hmun danga awmte pawh kan hrilhriat a, a hmaa kan e-roll awmnaa kan inziahluh leh vek a ngai dawn a ni.
Tuna kan lo inziaklut lo a nih chuan electoral roll atanga paih theih kan ni a, roll-a hming chuang lovin kan awm reng tawh thei tih hrerengin inziahluh hi ngai pawimawh ila, eng anga voters ID nei tawh pawh ni ila inziahluh that leh vek a ngaih miau avangin kan zawm tlan a tha hle.
Veng tin leh khawtina a buaipuitute lo thawhpui thiam ila, electoral roll-a kan chuan ngei a, paih ngaia kan awm loh nan SIR a inziaklutin, BLO te i lo thawhpui theuh ang u.