US President Donald Trump-a chuan Iran nena inbiakna chu kalpui mek zel a la nih thu a sawi a, hei hi Tehran-in indona tihtawp tuma Washington nena mi dang kaltlanga inbiakna tihtawp a ni tih a sawi nia sawi a awm laia a sawi a ni.
Trump-a hian Thawhtanni khan Truth Social-ah, “Inbiakna hi chhunzawm zel a ni a, chak takin, Islamic Republic of Iran nen,” tih a tar lang a ni.
President Trump-a’n social media-a hetiang a tar lan hma hian Iranian sorkar news agency Tasnim chuan Israel-in a sipaite chu thuk leh na zawka Lebanon ram nawr turin a hriattir hnuah Tehran chuan US nena mi dang kaltlanga inbiakna an kalpui chu a titawp tih a tar lang a ni.
He thu a darh hnua chanchinbuten telephone-a an biaknaah Trump-a chuan Iran-in Washington nena inbiakna a tihtawp thu an hrilh lo tih a sawi.
NBC News-in a kawmnaah Trump-a chuan, “Chutiang thu engmah min hriattir lo,” a ti.
Trump-a chuan an pahnih inkara ngawi renga awm chu a tha dawn tih sawiin nghah a inhuam thu a sawi.
“Thu dik hriat i duh chuan kan inbe tam lutuk niin ka hria. Ngawi renga kal a tha hlein ka hria a, chu chu hun rei tak chhung pawh a ni thei,” tiin NBC hi a a hrilh.
Inbiakna tihtawp a nih chuan US-in Iran-ah bomb a thlak tan dawn tihna a ni lo tih Trump-a chuan a sawi bawk a, US-in Iranian lawng chawlhhmun a dan chu kalpui reng a la ni dawn tih a sawi bawk.
CNBC-in a hrana an kawmnaah pawh Trump-a chuan inbiakna hi a tawp a nih pawhin a ngaihtuah lo tih a lo sawi tawh a. “An tawp pawh ka ngaihtuah lo, dik tak chuan … ka ngaihsak lo thei lo,” tiin a sawi thu an tar lang .
Hetianga chanchinbuin an kawmna an tihchhuah hnu lawkah Trump-a chuan social media-ah Iran nena inbiakna neih chhunzawm zel a nih thu a tar lang zui a ni.
US leh Israel tang dunin Iran an beih rawn hnuah tunah hian inkahhai kalpui mek a ni a, indo tihtawp tumin indawrna pawh a kal mek a; mahse, rah tha a la chhuah thei lo.
Iran chuan thil phut thar neiin Israel-in an thawhpui, Lebanon-a Hezbollah laka kut a thlak zui zel a nih chuan US nena inbiaknain rah tha a chhuah lo palh thei tih a sawi a. Washington erawh chuan Lebanon-a buaina chu thil hrang anga kalpui a tum ve thung bawk.
Hetiang a nih mek lai hian US hian kartawp khan Iran hi ‘mahni inven nan’ tiin a kap leh a, Tehran pawhin a chhan let nan Kuwait-a American sipaite awmhmun a bei ve bawk a. Inremna siam chu a chângin hnai anga sawi awm mah se boruak a la tang hle a ni.