Traffic police te chuan June 1 atang khan Aizawl khawpui chhungah lirthei tlan dan vil uluk lehzualin, a bikin zebra crossing chungchang hman dan an thlithlai uluk a, dan zawm lo leh ngaihpawimawh nachang hre lo erawh an la tam hle.
Hmun thenkhatah traffic police te chuan zebra crossing-a din tur a nih loh thute ziakin, langsar takin an tar a, mahse zawm nachang hre lo an la kat nuk tho.
Traffic police duty an awm emaw, awm lo emaw zebra crossing hi kea kalte tana siam a nih avangin lirthei khalhtuten kan zah a, eng anga traffic jam nasa pawh nise kan thlen dawnah chuan kan tlan muan a, kan din loh hram hram a tha hle.
Lirthei a tawt a, tlan zung zung a har deuh pawh a ni thei, mahse kea kalte kawng tur hi kan zah leh zuahsak thiam a, kea kalte pawhin zebra crossing laia kawng kan kan hram hram zel a tul a, mahni duhna laia kawng kan mai lova a hmunah tak kan kan fo a tha awm e.
Traffic police duty te ngaichang thiam ila, zebra crossing awmzia hre chungin lirthei i khalh chhuak fo thin ang u.