Muzaffarpur, Bihar-a mi mal enkawl damdawi ina kangmei chhuakah damlo enkawl lai pali an kang hlum.
District Magistrate Subrata Kumar Sen-a chuan damdawi inah hian damlo 24 an awm tih sawiin, kangmei tuar zingah Intensive Care Unit (ICU) in-charge pawh a tel tih a sawi a. Damlo tam zawk chu chhanchhuah an nih thu leh a bul hnaia damdawi inah dah an nih thu a sawi bawk.
Sen-a chuan ICU-a oxygen unit leh Prasad Hospital-a monitor system-a kangmei chhuak hi electric kal sual vang nia rin a nih thu a sawi a. “Chhuina kalpui mek a ni a, a chhan hi kan hre thuai ang,” a ti.
Fire department chuan Ningani zing dar 3:55 vela thil thleng a nih thu an sawi a. Team pakhat an kal nghal a, ICU leh ward dang thleng turin kawngkhar leh tukverh an tichhia a, damlote chu meikhu tam tak atangin an la chhuak tih an sawi bawk.
Fire department thuneitu, Ram Niwas Pandey-a chuan, “ICU atangin damlo 15-20 kan la chhuak a, an zinga pahnih chu a hmunah an thi a ni,” a ti.
Thuneitute chuan ICU chu chhawng nganaah a awm a, waiting hall chu chhawng lina-ah a awm tih sawiin, darkar khat vel hnua kangmei thunun theih a nih hnuah pawh chhanchhuah hna thawh a harsa hle niin an sawi.
Bihar-a kangmei chhuah hma ni, Nilaini zing khan Delhi-a khualbukah kangmei a chhuak bawk a, mi 21 an thi bawk a ni.