Meghalaya State Convention Centre, Shillong-ah Ningani khan NEC Plenary vawi 73-na, Union Home Minister Amit Shah, NEC Chairman ni bawk hovin neih a ni a. He hunah hian Chief Minister Lalduhoma, Ministry of DoNER hnuaia High Level Task Force on Northeast Economic Corridor (NEEC) Convener ni bawk chuan a final report bu chu Amit Shah hnenah hian a thehlut.
Chief minister chuan thu sawiin prime minister-in India hmarchhak bialte tana a hmathlir ‘Act East’ chu a that thu sawiin nakkin lawka India hmasawnna thlentu bulpui ni thei khawpin hmarchhak bial hi natural resource, mipui leh culture-ah theihna nei thuk tak a nih thu a sawi a. Kawngpui, railway, air link, waterway, power leh telecom-te inkungkaih taka ‘One-Grid Approach’ hmanga kalpui a that thu leh, Kaladan Multi-Modal Project puitling hnai tur atana inbuatsaih a ngaih thu sawiin, DoNER ministry-in border infrastructure leh logistics hub-ah te hma lakpui se a duh thu a sawi.
Lalduhoma chuan investment pawh rualkhai taka mau, agri-horti, food processing, textile leh eco-tourism-ah cluster-a kalpui a that thu sawiin north east chu trade gateway atan siam theih a nih thu a sawi a. |halaite chher hriam nan skill development leh start-up ecosystem lama nasa zawka hmalak a ngaih thu sawiin, project approval a lo chak zawk nan state tinah project implementation unit din a rawt bawk.
Mizoram chu ‘Ginger Capital of India’-a puan a nih avangin leh Thenzawl Peace City ruahman mek a nih avangtein lawmthu a sawi a, NEEC Report a thehluh hmang hian hmarchhak state-te inkalpawhna, tourism leh trade-ah tum thuhmun neia hlawk zawka hmalak a nih dawn thu a sawi a ni.
Plenary inkhawm Union Home Minister Shah-a’n a kaihhruaiah hian DoNER Minister Jyotiraditya Scindia, Minister of State Dr. Sukanta Majumdar, hmarchhak state chief minister-te leh official pawimawh tak takte an tel a ni.