Aizawl: Sports & Youth Services Minister Lalnghinglova Hmar chuan Mizoram infiamna kawnga hmasawnna a awm theih nan leh vengchhung hrang hrangah infiamna pawimawhna hriattir nan, ‘Empowering Mizoram Sports (EMS) Awareness Campaign’ chu Aizawl Municipal Corporator leh local council-te tana ATI Auditorium, MINECO-a buatsaih a hmanpui.
Minister Lalnghinglova Hmar chuan, an hun hman chu Mizoram sports tana ni chhinchiahthlak a nih thu sawiin, ‘Mizoram Bana Kaih Policy 2024’ hnuaia EMS kalpui dan khawtlang hruaituten an hriatthiam a, hma an lakpui chuan Mizoramin sports-ah hma nasa takin a sawn belh dawn a ni, a ti.
National leh international level, a bik takin Olympic-ah India leh Mizoram dinhmun a hniam hle tih sawiin, hei hi thlak danglam ngei tura EMS chu din a nih thu minister hian a sawi a. EMS hnuaiah hian Olympic 2036 hmathlirin sports discipline thlan bikah hma lak mek a ni a, kum 8-15 inkar naupang theihna neite zawnchhuah tum a ni a, hei hian Jeremy Lalrinnunga ang naupang dang tam tak chherchhuah a tum thu leh Inspire Institute of Sport (IIS) nen pawh thawhhona thuthlung siam a ni dawn tih a sawi bawk.
Sports minister chuan Aizawl Municipal Corporator-te leh local council hruaitute tel loin sports department chu a chet theih loh thu sawiin, “Olympic 2036, India rama thleng tura ruahmanah hian Mizo infiammi pakhat tal an luh ve kan duh a ni,” tiin, mahni vengchhung theuhah tan la a, naupangte theihna haichhuaktu leh chherchhuaktu ni turin kalkhawmte chu a chah.