Chinese President Xi Jinping-a chuan tun kar hian North Korea-ah Kim Jong Un a hmu dawn a, kum sarih dawn hnua a tlawh hmasak ber tur a ni tih ram pahnihte sorkar chanchinbuten an tar lang.
Xi-a hi Kim-a sawmna angin Thawhtanni leh Thawhlehni hian North Korea-ah a tlawh dawn a. Xi-a’n Pyongyang a tlawh hnuhnun ber chu kum 2019 kha a ni.
Xi-a’n Beijing-a US President Donald Trump leh Russia President Vladimir Putin-a a mikhual hnu chawlhkar eng emaw zat liam hnuah North Korea hi a tlawh dawn a ni.
Eibar leh politic-a China kawppui, North Korea hi nuclear ralthuam program leh mihring dikna chanvo bawhchhiaa puh a nih avanga ram dangin an hrek lai mek a ni.
China leh North Korea hian km 1,400-a thui ram an inri a, ram venhimna kawnga inremna a neihpui ram awmchhin a ni a. An pahniha pakhat zawk hian beih a tawk a nih chuan inpui tura inremna nei an ni.
Kumin hi chu thuthlung siam kum 65-na a ni.
Kim-a tan chuan Xi-a’n a tlawh tur hi a pawimawh hle a. North Korea hi hripui leng tuar chhuakin Russia lam tanga Ukraine indonaah a tel hnuah khawvel mithmuhah a dinhmun a tha ve mek zel.
Beijing hi Pyongyang leh Moscow nen inzawmna nghet tak nei mah se Xi-a hian Kim-a leh Putin-a inkar tha zel chu a ngaihven hle a ni.
Pyongyang hian Russia lam hawi deuh thin mah se sumdawnnaa a thawhpui lian ber, Beijing hi Kim-a tan chuan nunna atana pawimawh ber a la ni reng.
Kim-a hian tuipui kam leh vur tlengna hmun a siam tharte tlawh turin ramri kaltlanga sumdawnna tam zawk leh Chinese khualzin tam zawk an luh theih dan a dap beisei a ni.
Kim-a hian a nuclear leh missile a pho lang nasa a. Mi pawimawh tlawhtute hmaah an khawpui, Pyongyang a pho lang nasa bawk. US hmaa kût lo leh South nena inzawmna nei lovin thil a ti thei tih pho lan a a duh viau bawk.
Kim-a hian December, 2024-a South nena inpumkhatna tura hmalakna tihtawp a nih thu puan atang khan South Korean-te mchu hmêlma thutiam neiah a sawi a, Seoul nena inbiakpawhna zawng zawng a titawp tawh bawk.
Seoul-in pawh tuma hma a lakna chuan Pyongyang-ah a ri chhuah pha rih lo niin a lang.
Seoul chuan Xi-a’n a tlawh hi an inkara palai a nih theih a beisei a, Pyongyang hi Seoul leh Washington nena inbe chhunzawm turin nawr se a duh.
South Korean Unification Minister Chung Dong-young chuan Xi-a’n Kim-a nena an inkawmnaah US leh North Korea inbiakna tan leh dan tur a sawipui a rin thu a sawi.
Thla hmasaa Trump-Xi inkawmnaah khan hruaitu pahnihte hian North Korea-a nuclear ralthuam tihbo tumna an neih chu an nemnghet leh a ni.