Aizawl: World Environment Day denchhenin Aizawl Municipal Corporation Corporator (Lead Facilitator) leh Official ten bawlhhlawh sawngbawlna hmun hrang hrang leh Aizawl Bazarpui tlawhin, Inrinni khan bawlhhlawh sawngbawl dan te an enfiah.
AMC Corporator te hian Aizawl Bazarpuiah kalin bawlhhlawh thliar hran dan zirtirna an nei bawk.
Corporator leh Officer te hi Team li-ah inthenin Solid Waste Management Center leh Common Bio Medical Waste Treatment Plant, Tuirial te, Reduce Reuse & Recycle (RRR) Center, Thakthing leh New Market, Dawrpui te a tlawh a.
Bawlhhlawh sawngbawlna hmuna thawktuten bawlhhlawh atanga lei tha an siam dan te, Bio Medical Waste an sawngbawl dan te an lo entir a. Reduce Reuse & Recycle Center a thawktuten bawlhhlawh siam tlem, hman nawn leh recycle kawnga hma an lak dan an lo entir bawk.
Corporator (Lead Facilitator) te hian chawlhkar thar chhung hian an ward chhung theuhah World Environment Day denchhena hmalakna an chhunzawm ang.