Aizawl: Oriflame Company chuan Inrinni khan Dawrpui Multipurpose Hall-ah ‘Mid Year Magic Mega Event’ an hmang a, he hun hi an leaders hlawhtling tharte puala buatsaih a ni.
He hun rawn hmanpuitu, Area Director Sanjay Pushkarna chuan Oriflame Mizoram chu India rama thang nasa ber leh No. 1-na hauh mektu State an nih thu sawiin, a chhuanzia a sawi a. Oriflame kaltlanga eizawng a, mahni intodelh leh chhungkaw chawm nana hmangtu Mizo taima tak tak singtel an awm chu lawmawm a tih thu leh an thawhrimna avanga lawmthu a sawi bawk.
He hunah hian level thar kai sang tam tak chawimawina pek an ni a. Heng zingah hian title thlen har tak, ‘Diamond Director’ title thleng thar, Rengthangpuii Sailo chu chawimawi a ni. He title hian cash award Rs nuai 3 bakah, thlatin hlawh Rs nuai 5 atanga nuai 10 thleng hlawh theihna a keng tel a, kum khatah vawi thum an travel partner duh ber nen a thlawnin India ram pawnah an zin thei bawk a ni.
Regional Sales Manager Lalsangpuii Hnamte pawhin a duh apiang tan Oriflame-ah hian eizawnna leh hamthatna a la awm thu leh puih an inhuam reng thu a sawi a. Mizoram No. 1 Leader Nancy Lalramthangi leh leader dangte pawhin an hlawhtlinna chanchin sawiin, fuihna thu an sawi bawk.