Aizawl: BJP Mizoram chuan an party pisaah Thawhtanni khan chhung inkhawm hun an hmang a. State President Dr. K. Beichhua, MLA chuan thu sawiin, “India-ah BJP leh a thawhpui NDA, Pu Modi kaihhruaina hnuaiah kum 12 chhungin union minister zingah eiruknaa hmingchhiatna nei tumah an la awm lo a, hei hian BJP sorkar dikzia leh thatzia a tar lang chiang hle a ni,” a ti.
Dr. K. Beichhua chuan BJP sorkarin corruption chu a zung atanga phawi tumin Direct Benefit Transfer (DBT) hmangin kawng laka sum bo thinte a titawp a, sorkar sum tam tak a hum phah tih a sawi a. Eirukna dona kawngah central agency-te an thawk tha hle tih sawiin, tun hnaia Mizoram leh Myanmar inrina fiahnaa kuhva smuggling kalpuina atanga Rs. vbc 970 man chhuah a nih thu a sawi a. Hei hi ‘e-way bill’ dik lo hmanga sumdawnna thil, thil pawi tak a nih avangin Mizoram mipuite pawh buaina lian zawk lakah an fimkhur a ngai a ni, a ti bawk.
“Mizoram tana hmasawnna pawt chhuak tak tak thei tur chu BJP a ni, a chhan chu central-a sorkar mek kan nih vang a ni,” tiin state president chuan Mizoram mipuite sorkar awmze nei leh MP thil tithei neih ve an phu tih a sawi a. Politics awm chhan ber chu hmasawnna a nih avangin mipuiin BJP nihna dik tak an hriat a pawimawh tih a sawi.