Aizawl: Mizo Students’ Union (MSU) hruaitute chuan Thawhtanni khan Chief Minister Lalduhoma chu a pisaah hmuin, MPSC chungchang leh hnam dangin dik lo taka Mizo hming an hman fo thin chungchang an thlen.
MSU hruaitute chuan chief minister hnenah hian Mizoram Public Service Commission (MPSC) inthlahdah avanga sorkar hna lakah buaina a awm fo chu pawi an tih thu sawiin, a bik takin tun hnaia Jr. Grade of Legal Service hnalakah buaina thar a awm leh chu pawi an tih thu an thlen a. Mizorama Group ‘A’ Officer thlenga MPSC-in tihsual an nei ta fo hi ngaihzam a har an ti hle a, MPSC Chairman hian a hnuaia hnathawkte a vil tha tawk lo hle nia an hriat avangin, Chairman hi bang ngam tura thurawn pe turin Chief Minister hi an ngen a ni.
Hemi bakah hian tun hnaia tualchhung chanchinbu pakhat tihchhuah, hnamdang (vai) ten official document-a hman tur atana Mizo hming lo vuah leh lo thlak an awm chungchang pawh an thlen a. Hnam dangten dik lo taka Mizo hming an hman fo hian ILP pumpelh tumna leh Tribal Certificate neih tumna tha lo tak a hrinchhuah theih avangin, hetiang thil hi tihtawp a nih theih nana hma laksak turin an ngen bawk.
BSF-a Mizoram quota hnawhkhat tura document diklo leh lem siamtu mi pariat tun thlenga man chhuah an la nih loh chungchang pawh thlenin, a rang lama hma laksak turin chief minister hi an ngen.
Chief Minister Lalduhoma chuan MSU hruaitute thil thlen chu pawimawh tak tak vek a nih thu a sawi a, Chief Minister a nihna anga theihtawp chhuaha lo bawhzuisak a tum thu a lo tiam a ni.