Mizoram Rajya Sabha Member of Parliament thlanna neih turah political party pahnihin candidate an nei.
Thawhtanni tlai dar 3 thleng kha he inthlanna neih turah nomination theh luh theih hun hawn a ni a. ZPM leh MNF ten candidate neiin nomination thehluh theih hun chhungin an thehlut ve ve a. BJP leh INC ten candidate an nei ve ta lo a ni.
ZPM party candidate K. Laltluangkima hian June 5, 2026 khan nomination a tifel a. Nimin khan RO hmaah hian oath-taking a ti ve leh nghal bawk a. Oat-taking-ah hian dan angin proposer pakhat, TBC Lalvenchhunga, MLA leh party aiawhin R. Malsawmtluanga, General Secretary, ZPM party Election Department ten an telpui.
Thawhtanni vek khan MNF party Senior Vice President Dr. R. Lalthangliana’n Rajya Sabha MP inthlan lo awm tura an party candidate atan Zothansangi Hmar a puang a. Nimin la la khan RO Zothantluanga Ralte, Assembly Commissioner hnenah nomination a tifel hman a, oath-taking a la nghal bawk.
Rajya Sabha MP candidate te hi vawiin hian RO-in a endik dawn a. June 11, 2026 thleng inhnuhdawhna hun hawn a ni.
June 18, 2026 chawhma dar 9 leh tlai dar 4 chhungin MLA 40-ten vote an thlak ang a. Hemi tlai la la dar 5 hian vote chhiar nghal a ni ang.
MLA 40-ten vote an thlak dawn a, ZPM-in MLA 27 an nei a, MNF 10, BJP pahnih leh INC pakhat a ni.
Rajya Sabha MP thlanah hian Mizoram MLA pakhat vote hlutna hi 100 zel a ni a. Tling turin vote 2,100 (MLA 21) mamawh a ni.