Aizawl: Chief Minister Lalduhoma chuan All India Radio (AIR) chu Zo hnahthlak insuihkhawmna hmanraw pawimawh tak leh, kar hlaa awm hnam hrang hrangte awi tleitu a nih thu a sawi.
He thu hi Thawhtannia Vanapa Hall-a All India Radio kum 90 tlin lawmna (Platinium Jubilee) a kalpui a hmanpuinaah a sawi a ni. Chief Minister chuan AIR chu kum 90 chhung India mipuite awi tleitu ber leh rin ber a nih reng thu sawiin, ram chhunga mai bakah khawvel huapa Radio Network lian ber a nih thu a sawi a. |awng hrang 23 leh chibil tawng (dialect) 146 chuang hmanga thupuang chhuakin, ram 100 chuangah ngaihthlak a ni, a ti.
Oxford University-a Reuters Institute for the Study of Journalism report-in a tarlan danin, Akashvani News chu India ramchhunga News puanchhuahna rintlak ber a ni tih Lalduhoma chuan a sawi a. AIR chu Mizo tawng hman dik chungchangah entawn tlak a nih bakah, hnam zia leh kan hun hmasaa thil thleng pawimawh vawnghimtu a nih thu a sawi.
Mizoram bik thlirin Lalduhoma chuan AIR Aizawl Station chu July 31, 1966-ah din a nih thu sawiin, rambuai lai te, curfew avanga inkhawm theih loh lai te-a mipuite thlamuanna leh chanchinthar rintlak petu a nih thin zia a sawi a. Mizote zinga zaithiam hmingthang tam tak chu AIR Artist te an nih thu leh, lungngai leh khawhar hnemtu a nih reng thu sawiin duhsakna a hlan a ni.
Akashvani Director leh Mizoram Cluster Head, DR Lalropuia pawhin inlawmna thu sawiin, AIR hi June 8, 1936 khan din a nih thu leh, tun thlenga mipuite rin ber a la nih tlat chhan chu tunlai khawvel hmasawnna mila thil thar an buatsaih reng vang a nih thu a sawi a. India ramin Viksit Bharat 2047 hmalakna hnuaia ram hmasawn nih a tumna kawngah pawh Radio chuan mawhphurhna pawimawh tak a nei zui zel dawn tih a sawi bawk.
He hunah hian AIR Artist hrang hrangte zai ngaihthlak a ni a, Radio kum 90 zinkawng Documentary thlir a nih bakah, AIR Station-a vawi 100 chuang bawk thusawi tawh te hnenah chawimawina hlan a ni.