VB: G RAM G hnuaia hnathawh kalpui mek leh kalpui zel dan tur sawifiahna leh inrawn khawmna, State Level Orientation on Vikshit Bharat: Guarantee for Rozghar Ajeevika Mission Gramin chu Rural Development Minister Prof Lalnilawma hovin Thawhtanni khan I&PR Conference Hall-ah neih a ni.
Rural Development department Additional Secretary V Lalengmawia kaihhruai State Orientation-ah hian khuallian, Rural Development Minister Prof Lalnilawma chuan, Vikshit Bharat kalpuinaah hian kum 2047-a India-in zalenna a hmuh kum 100 a tlinna turah eng dinhmunah nge an din dawn tih an chhut a ngai tih sawiin, ni 125 inhlawhna chu Mizoramin hmasawnna atan an hman tangkai ngei a beisei thu a sawi.
He scheme kalpuinaah a hma lamah chuan state-in a dolet ve tur chu Rs vbc 28 vel a ni thin a, tuna July ni 1 atanga hman tan tur VB G RAM G ah hian state share Rs vbc 128 in a pung dawn a, hemi tlin thei tur hian hma lak mek anih thu a sawi bawk.
Mizoram puma Job card pek chhuah zat chu 2,12,044 niin, a taka inhlawh (active job card) 20,07,880 an awm mek thu inkhawmah hian tar lan a ni.
July 1, 2026 atangin VB:G RAM G hi ram pumah hman tan a ni dawn a. Chumi inbuatsaihna kal zelah State Level atanga Village Level thleng Orientation leh Public Outreach (Jan Samvaad) neih mek zel a ni a. Mizoram pawhin in buatsaihna nasa taka kal puiin, the Mizoram VB:G RAM G Scheme, 2026 chu Council of Ministers in a pawm hnuah notify niin, India rama VB:G RAM G Scheme siam hmasa ber a ni a. VB:G RAM G hnuaia ni 60 chhung chawlh, seasonal pause pawh Mizoram chuan a notify tawh bawk.
Seasonal Pause chhung hian VB:G RAM G hna reng reng thawh phal a ni lo ang a, thingtlang mi ten buh tuh leh buh seng laia anmahni leh midang hnena an inhlawh theih nana he seasonal pause hi duan a ni.