Aizawl: Mizoram Chief Electoral Officer (CEO) Garima Gupta chuan Thawhtanni khan Aizawl Press Club-ah thu thar thehdarhtute a kawm a, Special Intensive Revision (SIR) 2026 kalpui mekah Enumeration Form (EF) 8,42,312 pek chhuah a nih tawh thu a sawi a. Hei hi Mizorama voter awm zat (electors) atanga chhuta 96.26% lai a tling a ni. CEO chuan mipuite chu inziah luhna atan ECINET App hmang tangkai turin a ngen bawk.
June 28, 2026 thleng hian Enumeration Phase hi kalpui a ni dawn a, tun thlenga chhinchiah danin Mizoramah voter 8,75,068 an awm a, heng zingah hian mipa 4,23,397 leh hmeichhia 4,51,671 an awm a ni.
Form semchhuah tawh 8,42,312 zingah hian tualchhung data lakkhawm leh chhinchiah tawh (physically collected) hi 1,67,426 (19.13%) a ni a, hetih lai hian digitized erawh 1,67,530 (19.14%) a ni thung. Data lakkhawm aia computer-a dah luh tawh (digitized) a tam zawk chhan hi Chief Electoral Officer (CEO) website leh ECINET App kaltlanga online-a lo inziaklut an awm vang a ni.
Mizoram Chief Electoral Office chuan mipuite chu he App hi a tam thei ang ber hmang turin an duh a. Download duh tan Google Playstore leh Apple App Store-ah te awlsam taka lakthlak theih a ni. Election Commission of India (ECI) lam chuan he App hmanga inziahluh hi a harsat loh thu an sawi.
Tuna BLO ten in tina tlawh meuhva hna an thawh (House-to-house visit) hi June 28, 2026 thleng a awh dawn a. Hei hi a zawh hnuah July 5, 2026 hian Draft Electoral Roll (Voter List lailawt) chu tihchhuah a ni ang.