Aizawl: Mizoram Pradesh Congress Committee (MPCC) chuan Thawhtanni khan Congress Bhavan Golden Hall-ah Political Session an hmang a. He huna thusawitu Environment Protection & Social Justice Cell Chairman James Thanghmingmawia chuan, “ZPM-te hi an sorkar hma a an thutiam leh an thusawi te an tihhlawhtlin lohzia leh an sawi letling hlauha an kal dan hi a makin a vanduai thlak hle a ni,” a ti.
James-a chuan ZPM MLA candidate-ten election hmaa fihlim tura thutiam an lak lawk te, leh K. Sapdanga’n ‘contract hna chu contractor-in an thawk ang’ a lo tih tawh te chu dawt vek a ni tih sawiin, duhsak bikte hna an pek theih nan sorkar dang siam ngai loh kalphung an siam zawk tih a sawi a. June 6, 2024 khan Council of Ministers chuan contract tender chhanna chu 5% aia hniam leh 10% aia sanga chhan khapna chu thar thawhin, an mi leh sa vulh nan an hmang tih a sawi.
Khapna hi Ruata Sailo chuan high court-ah khingin, court-in May 20, 2026-a a tihkhawtlai tak avangin sorkar pawhin May 26 khan an order tihkhawtlaina tur an siam ve chuk chuk phah a, home department-a hna tender chhuah tawh pawh eng emaw zat cancel a ni, a ti bawk.
Congress hruaitu chuan ZPM-in campaign laia Restricted Tender an sawisel nasat zia leh chief minister Lalduhoma’n Assembly-a a dodal thin zia hriatpui a nih laiin, an sorkar hnu hian sorkar kal tawh zawng zawng aiin an uar zawk daih tih a sawi a. April 17, 2024 khan Rs vbc 629.17 man hna 76 leh, October 22, 2025 khan Rs vbc 328 man hna 41 lai chu Restricted Blanket Approval hmangin an duhsak zawng te an pe vek niin a sawi.