Democratic Republic of Congo chuan an rama Ebola leng mek vanga thi chu mi 101-ah an kai ta tih an sawi a. Hetih lai hian a tuar na ber province hi ralthuam keng pawl awmna a nih avangin hri leng beituten harsatna tawk an tawk a, an hmalakna tihkhawtlai chhunzawm zel a ni.
Ebola Bundibugyo strain leng hi May 15 khan puan a ni a; mahse, thuneitute chuan a hma chawlhkar tam tak chhung chu hriat lohvin a awm tih an sawi a, hei vang hian damdawi thuneitute chuan thunun tumin an bei nasa hle.
Hun rei tak chhung ralthuam hmanga indonain a tihbuai tawh province pathum-ah hri hi a leng nasa zual a, hengte hi DR Congo khawchhak lama Ituri, North Kivu leh South Kivu province an ni.
Thawhtannia dinhmun thar tihchhuahah Congo sorkar chuan a hma darkar 24 kalta chhungin hri kai hmuhchhuah thar mi 35 an awm tih a sawi a, heng zingah hian mi 10 an thi a. Hri kai hmuhchhuah zawng zawng chu mi 550 an tling ta a, thi pawh mi 101 an tling ta a ni.
Ituri-a health zone 17 bakah North Kivu-a health zone pasarih leh South Kivu-a health zone pakhatah hri kai hmuhchhuah a ni tawh.
Hri leng mek beih letna hi tual chhunga inrinngam lohna leh dodalna chuan a tiharsa hle a, mitthi phumtu team leh hri kai enkawlna hmun hrang hrangah harsatna a awm tih sawi a ni.
Hetianga hri kai leng hmachhawntute laka pawikhawihna hnuhnung ber hi Pathiannia thleng niin thil thleng hrechiangtu chuan a sawi a, Bunia-a Nyamurongo thlanmualah mi phumtu team beih a, mi pahnihin hliam na tak an tuar a, lirthei pahnih a chhia a ni.
Hri vanga thite hi a sawngbawl leh buaipuitu tura inzirte chauhvin tih tura tih a ni a, hei hi mi tam tak chuan an chhungte ruang an thlah theih lohnaah ngaiin an tibuai thin a ni.
Dinhmun thar report-ah chuan Ituri-a ralthuam keng pawl awmna – Djugu, Irumu leh Mambasa-ah chuan heng mite hian ‘health zone tam takah mihring puihna leh hri leng do letna hmalakna tihtlem a nih theih nana’ dodalna an kalpui zel tih tar lan a ni.
Ituri province khawpui, Bunia chu hetiang boruak hian a tibuai lo deuh nia sawi a ni.
Report thar tihchhuah hma, Thawhtanni chawhma lam khan Africa-a public health agency lian ber chuan Congo-ah Ebola vei hmuhchhuah zat chu 544 an tling tawh tih a sawi a. Africa Centers for Disease Control & Prevention hian Congo-a Ebola vanga thi nia hriat chu mi 88 an nih thu an sawi bawk.