Kum 2029-a ram inthlanpui atana an hma an lak dan tur ruahman tura an thutkhawmnaah eptu party tangrual, Indian National Developmental Inclusive Alliance (INDIA)-a tel party 23-te chuan thukhat vuaa kal ho zel an tum a, tun hnaia state inthlanpui ‘rawk’ nia an puh, rorel lai, BJP chu na takin an bei bawk.
Tun hnaia state assembly inthlana BJP-in West Bengal-a Mamata Banerjee kaihhruai Trinamool Congress (TMC) lakah hnehna an chan hnua thukhawmte hian Congress party chu eptu pawl inthen darh tawhte inzawmkhawmna ‘chartu’ a nih thu an pawm a. Hruaitu zingah tumahin he huna tel ve lo, Dravida Munnetra Kazhagam (DMK) chu an sawisel lo va, nakina an zinga tel tura inremna siam tura beiseina an nei nia ngaih a ni.
Thawhtannia an thutkhawm zawha thuthar lakhawmtute a kawmnaah Congress president Mallikarjun Kharge-a chuan INDIA chuan Special Intensive Revision (SIR) chungchangah Chief Justice of India hnenah lehkha thawn an rel a, thutkhawm tam zawk neih an rel a, exam zawhna put chungchangah Education Minister Dharmendra Pradhan-a bân an phut a, parliament-ah tanrual zel an tum a, mipuite ngaih pawimawh chungchang sawiho turin sorkar laipui chu all-party meeting koh tura ngen an tum ni se an ti tih a sawi.
“SIR, vote ruk leh inthlan ruk chungchangah Chief Justice of India hnena lehkha thawn tura inremna siam a ni a, lehkha hi thlen thuai tur a ni,” a ti.
Congress hruaitu chuan, “Education minister hian NEET leh CBSE exam-a inlan thalai nuai tam takte phatsanna a kaihruai avangin bân nghal tura phut chu lungrual takin an remti a ni,” a ti.
Kharge-a chuan INDIA hruaitute chu thla hnih danah thutkhawma ram politic vir vel thlirletna leh inlungruala kal zel dan tur rel thin ni se an ti tih a sawi bawk. An inhmuhkhawm leh tur chu August 8-ah Hyderabad-ah a ni ang.
A tawp khar nana thu sawitu, Leader of Opposition Rahul Gandhi-a chuan, “Tuma luh ve lohnaa thutkhawmah hian Mamata Banerjee-i’n inthlanna chu ruk bo a ni tih 90% zetin a chiang tih a sawi a. Akhilesh Yadav leh Tejashwi Yadav te pawhin ruk a ni tih 40% zetin an chiang a, inthlanna hi rukbo a ni tih 100%-in ka chiang a ni,” a ti.
Gandhi-a chuan ram chhungah ‘eibar dinhmun chhiatna’ lo thleng tur pawh a sawi a, sorkar chu tichhetu a nih thu leh eptute chu mipui thlawpna hmuh tumin an inbuatsaih a ngai tih a sawi.
Thutkhawmah hian Rashtriya Janata Dal (RJD) hruaitu, Tejashwi Yadav-a chuan INDIA atanga Bihar chief minister hlui, Nitish Kumar-a chhuah phalsak a ni leh coordinator hna pek vat a ni lo kha thil tihsual lian tak a nih thu a sawi ve bawk.
Eptu tangrualte thutkhawmah hian party inmil lohna pawh a lang tho bawk a. A telte sawi danin Communist Party of India (Marxist) MP John Brittas-a chuan Kerala-a an khingpui, Congress campaign dan chungchangah Gandhi-a a sawisel.
Brittas-a hian Congress-in Prime Minister Narendra Modi-a BJP nena inremna an neih thup anga an puhna chu a dik loh thu a sawi a ni.
West Bengal assembly inthlanpuia chak lo, TMC hotu, Mamata-i Mamata chuan INDIA-a tel party hrang hrangte chu insawisel lo turin rawtna a siam.