Aizawl: Chief Minister Lalduhoma chuan NITI Aayog Governing Council vawi 11-na New Delhi-a neihah kum 2047-ah India ram GDP-ah Mizoram chuan 1% thawhchhuah ve theih a tum thu a sawi.
Prime Minister Narendra Modi kaihhruaia Rashtrapati Bhavan Cultural Centre, New Delhi-ah chief minister chuan Mizoram chu India-a fully literate state hmasa ber a nih bakah, Human Development Index-ah a thang chak hle tih a sawi a. ‘Viksit Bharat 2047’ milin ‘Transformed Mizoram 2047’ kalpui mek thu a sawi.
Lalduhoma chuan Mizoramin full literacy chauh duh tawk lovin digital leh financial literacy lamah tan lak a ni a, AI, drone leh solar technology-ah te training pek niin sorkar kum kalta chhung khan thalai 26,500 hnenah pek a ni a, an zinga 72% aia tamin hna an hmu zui tih a sawi a. India Skills Northeast Competition 2025-26-ah pawh Mizoram chu champion state a ni a. Hemi bakah hian entrepreneur-te bultan chhohna turin ‘Mizoram Handholding Venture Capital Fund’ leh ‘Chief Minister’s Innovation Challenge’ kalpui mek a ni a; digital hmasawnna ngaih pawimawh a nih avangin e-office leh land record digitisation te pawh chak taka kalpui niin, telecom network-ah pawh tele-density 112 neiin hmarchhakah a tha ber zinga mi an nih thu a sawi.
High Level Committee on North East Economic Corridor (NEEC) convener a nihna anga thu sawiin chief minister chuan hmarchhak state-te mual khata thlira kawngpui, rel, thlawhna, tui leh telecom inthlunzawmna ruahman chu tihhlawhtlin thuai a tul thu a sawi a. He rawtna hi June 4 khan NEC Plenary-ah Home Minister Amit Shah hnenah a lo thehlut tawh a ni.
Lalduhoma hian Act East Policy leh Indo-Myanmar-Thailand Trilateral Highway tihhlawhtlin thuai a tulziate, Thenzawl Peace City din chungchang leh Mizoram sorkar Handholding Programme chu sorkar laipuiin special support pe thei se a duh thu a thlen a. NITI Aayog State Support Mission 2.0 lo chhuak thuai se a duh thu a sawi bawk.
Prime minister-in oil leh gas renchem a ngenna anga Mizoram sorkar hmalakna tlangpui sawiin, chief minister chuan Nilaini apianga sorkar motor hman loh ni, ‘No Official Vehicle Day’ kalpui a nih thu te, VIP convoy tihtlem a nih thu te leh public transport hman uar inzirtirna kalpui a nih thute a sawi a, Mizoram chu sorkar laipui leh NITI Aayog thawhpuina hnuaiah Viksit Bharat 2047 tihhlawhtlin ngei tum tlat chunga hmalam pan mek a ni tih a sawi a ni.
Council-ah hian ‘Human Capital for Viksit Bharat’ tih thupui hman a ni.