US leh Iran chuan Middle East pumah a zawna a ni hnih nan an in bei tawn leh a, hei hian April thla atanga inkahhai derthawng tak an kalpui mek chu a tinghet lo zual hle.
US Central Command (Centcom) chuan Iran chhim lama sipai, surveillance leh radar site-te ‘mahni inven nana an beih’ chu an zo tawh tih a sawi.
Beihna hi President Donald Trump-a’n US sipaiten Iran hi ‘na taka an beih’ tur thu a sawi hnua kalpui a ni a, Tehran chu indona tihtawp a nih theih nan ‘inremna siam nan hun rei tak a hmang’ tih a sawi bawk.
A chhan let nan Iran chuan he bial chhunga ram hrang hranga US sipai thil neihte a bei zui ve ta bawk a ni.
Bahrain leh Kuwait-a US military base-te chu a zawnin ni hnih chhung Iran-in an kap a, Iran-a Islamic Revolutionary Guard Corps (IRGC) chuan Jordan-a US command centre pawh ballistic missile hmangin an kap niin Iran sorkar chanchinbute chuan an tar lang bawk.
Bahrain interior ministry chuan an air raid siren chu zankhuaa a rik thu a sawi a, Kuwait Army pawhin X-ah an anti-air defense system-in ‘van sang atanga beih tumna’ an lo dang tih an tar lang bawk.
Kuwait chuan Iran beihpui thlakna avang hian an chung boruak chu hun eng emaw chen an khar tih a puang.
Inbeihna thar berah hian IRGC chuan Strait of Hormuz paltlang tuialhthei phur lawng pahnih an kap tih Iranian sorkar chanchinbute chuan an tar lang bawk a; mahse, hei hi finfiah a la ni lo.
Iran sorkar chanchinbin Strait of Hormuz chu ‘lawng chi hrang hrang tan khar vek’ a nih thu an tar lan hnuah a ni a. Centcom erawh chuan ‘Strait of Hormuz-ah hian sumdawng lawngte chu an lut leh chhuak chhunzawm zel’ a ti ve thung.
Lawng kawng khar a nih hnu leh lawngte beih nia sawi a awm hnuah tuialhthei man a sang nghal.
Khawvel pum huapa tehfung anga ngaih Brent crude oil chu 2% velin a san hnuah barrel khat $95 velah a kai chho a ni.
US-in a beih thar leh hma darkar eng emaw zatah Trump-a chuan, “Nizan khan nasa takin kan che a, vawiinah pawh nasa takin kan bei leh dawn a ni,” tiin a lo sawi lawk tawh a ni.
Trump-a chuan Truth Social-ah Iranian hruaitute hian ‘inremna siam turin hun rei tak an hmang’ tih a tar lang bawk.
US Defence Secretary Pete Hegseth-a chuan Iran chu inremna siam theihna hun pek a ni a; mahse, a hmang tangkai lo tih sawiin, an ram chhunga ‘hmun pawimawhah bomb thlak’ a nih tur thu a sawi.
US president chuan remna thuthlung siam a nih loh chuan Iran chu beih leh a nih tur thu a sawi bawk.
Iranian President Masoud Pezeshkian-a chuan Iran chu ‘nawrna leh vauna eng lakah pawh a ding nghet zel dawn’ tih a sawi a. Foreign ministry pawhin a hmain US chu ‘thu inkal thelh tak tak tak a tihchhuah hmangin indawrna a tichhia’ niin a lo puh tawh bawk.
April thla khan US leh Iran chuan inkahhai an lo rem ti a, a tirah chuan kar hnih chhung daih tura ruahman a ni a. Hemi hnu hian inkah leh zauh nei mah se indona tak takah an kir tawh lo.
Tun hnaia Washington leh Tehran inbiaknain hma a sawn lo va, inbeihna pawh a awm leh ta a ni.
Tun kar chhung khan US helicopter pakhat chu Iran nia hriat kah avangin a tla a. US chuan bei nghalin IRGC hian chhan let nan Middle East puma US base-te an bei ta a ni.
UN Secretary General António Guterres-a chuan Middle East chu ‘harsatna thuk zawkah hruai luh a ni’ tih X-ah a tar lang.