Aizawl: Indian National Trust For Art and Culture Heritage (INTACH) Lunglei Chapter hruaitute chuan Darzo ram chhunga kum 1890-a vailian vawi hnihnaa kulh lo din tawh, ‘Fort Tregear’ chu tuaihnum an tum a. Inrinni khan Darzo khawtlang hruaitute sawipuiin, a hmun tlawhin hmalak dan tur an enfiah rualin chei thar lehna tur hi an khuhhawng nghal.
INTACH, Lunglei Chapter hruaitu, K. Lalsanga, Co-Convener, JC. Vanlal Hmuaka, Member Secretary leh Dr. Lalhminghlua (Archelogist) te chuan Darzo khua hi tlawhin, he khuaa pipu sulhnu hluite enkawla tuaihnum chhunzawm dan tur chungchangah Darzo khawtlang hruaitu VC leh NGO hrang hrang hruaitute an sawipui a ni.
Fort Tregear chungchang bakah hian British Missionary Zirtiri (Miss Edith Mary Chapman) School dinna te, Liandala chen tawhna hmunhma te uluk taka enkawl a, tuaihnum dan tur chungchangte an sawiho bawk.
Hmunhma cheimawi nan INTACH Lunglei Chapter hruaitute hian Tlaizawng kung 1,000 an kensak chu YMA Day khan YMA member-ten hnatlangin an phun nghal a ni.