India sorkar in state hrang hrangah Special Intensive Revision (SIR) kalpui mekin, khawtin leh veng tinah BLO leh Asst. BLO ten buaipui hna an thawk mek a, mipui lam pawhin kan ngaih pawimawh lehzual a tha hle.
Hun tiam chhunga zawh fel hman tura tih a nih avangin tunah hian SIR hi kalpui mek a ni tawh a, a buaipuitu lamin theihtawp chhuah mahse, hmun thenkhatah erawh ngaih pawimawh a hlawh tawk lo hle nia sawi a ni.
Form awmsa ziahkhah a, lamkhawm leh mai tur a nih laiin hmun thenkhatah chuan ngai pawimawh tawk lo, a ziahkhah tur lai pawh ziak tha peih lo, thawktu leh buaipuitute pawh hrilh chuang lo an awm niin a lang a, a tha lo hle.
A buaipuitute harsatna siam zawngin khawsa lo ila, mitinin kan tihtura tukte uluk leh tha taka ti turin lo inbuatsaih ila, kan zawh fel veleh a buaipuitute lamkhawm kher pawh nghak lovin a hmunah tak thehluh ve mai turin mipui lam pawh kan lo insiamrem ve a tha hle.
SIR hi a pawimawh a, e-roll atanga paih theih kan ni tih hrerengin, tun hi hun pawimawh leh siamthat duh kan neih pawh siamthat hun a ni tih i hre thar leh ang u.