Aizawl: St. Paul’s Higher Secondary School, Montfort Hills, Tlangnuam-ah kum 2026-2027 chhunga zirlai hruaitu tur House Captain thlan thar 20-te lak luhna ‘Investiture Ceremony 2026’ buatsaih a ni a. He hun hi Mizoram Larsap, General (Dr) Vijay Kumar Singh chuan khuallian niin a hmanpui.
Larsap hian Louise House, Montfort House, Gabriel House, Francis House leh Abraham House hruaitu thlan tharte badge a bel sak bakah house flag a hlan.
Larsap chuan hruaitu thlan tharte duhsakna hlanin, “Hruaitu dik tak nihna chu midangte hnena thu pekah ni lo vin, rawngbawlsakah a innghat zawk a ni. Hruaitu tha chuan ngun takin midangte a ngaithla a, thil nih dan hre thiam zung zungin, entawntlak taka nungin mite a hneh thin,” a ti a. Hruaitu dinhmun chu hamthatna dawnah ni lovin midang tana pek tamah teh tur a nih thu leh, ramin thalai rinawm leh chhawrtlak, khawtlang hmasawn nana thahnemngai a mamawh thu a sawi.
Zirna ngawr ngawrah insawrbing lova mihring puitling chher chhuah kawnga St. Paul’s School hmalakna chu fakawm a tih thu sawiin Larsap chuan, zirna chuan eizawnna kawnga thalaite a hrual piah lamah, khua leh tui tha ni tura a chher hriam tel a ngaih thu a sawi a. Tun hnaia thiamna danglam chak zung zung khawvelah zirlaite chu insiamrem thiam tur leh chhia leh tha hriatna fimkhur taka hmang thin turin a chah.