Aizawl: Information & Public Relations (I&PR) leh Food, Civil Supplies & Consumer Affairs Minister B. Lalchhanzova chuan Nilaini khan Champhai Press Club-ah thu thar thehdarhtute kawmin a department chan hrang hranga sorkar hmalakna leh hmachhawpte a sawipui.
Supply minister chuan a department bika thil dik lo awm thin, a bik takin retailer-ten ‘khawla kutzungpui in nem loh chuan a thla lehah buhfai in la thei lo vang’ tia mipui an hrilh thin chungchang sawiin, minister chuan hei hi mipui bumna dik tak a nih thu a sawi.
B. Lalchhanzova chuan, “Thla 10 chhung ngawt kutzungpui nem lo a nih chauhvin ration card atangin hming paih theih a ni a. Thla 10 a tlin hma chuan kutzungpui nem hman lo mah se, an chanpual chu retailer-te hian an dah tha ngei ngei tur a ni. Kutzungpui nem hman loh avanga thla leha ration buhfai la thei lo an awm a nih chuan, retailer-ten an ei ru tihna a ni,” a ti a. Mipuite pawh thil dik lo a awm a nih chuan aw chhuah ngam zel turin a chah.
Land Revenue & Settlement Department kalphung chungchang sawiin, minister chuan thawktu an tlem avanga an indaih loh thu a sawi a. Hemi sukiang tur hian kumin chhungin surveyor 40 lak thar an nih tur thu leh Champhaiah pawh dah ve ngei an nih tur thu a sawi a. Champhai phai zawl phei tangkai zawka hman dan tur sawiho turin thuneitute nen inhmukhawm a tum thu a sawi.
Mizoram Journalists’ Association (MJA) Champhai District chuan I&PR minister hnenah hian ngenna hrang hrang an thlen a. MJA member Aizawla kalte tana riahna tur hmun (guest room) buatsaihsak tur te, I&PR Champhai pisa (office) anmahni puala an la nei lo chu sorkar hmalaksak vat tur te, leh thawktu indaih lohna hnawh khahsak turin an ngen a ni.
Hei bakah YouTube-a chanchin thar rintlak loh leh finfiahna awm mumal lo laka hmalak a tul thu an sawipui bawk.
Minister chuan I&PR Department ram hmun hma te a hmunah a en tawh thu sawiin, M Plan hmanga proposal awm mek pawh bawhzui a, thawktu indaihlohnaah pawh theihtawp chhuah a tum thu thuthar thehdarhtute a hrilh a ni.