Tuikual North MHIP in an day hmannaah an bialtu MLA sawmin, Lalnghinglova Hmar, minister chuan nute chu an fate sorkar school-a dah uar turin a chah a, hei hian ngaihtuah a tithui hle.
Zirna hi a pawimawh a, chhungkaw tinin kan fate chu zirna tha dawng se, hmasawn turin ke pen se kan duh vek a, mahse zirna bul an han tan a, mimal enkawl school-ah kan dah leh thin thung si.
A nihna takah chuan sorkar school-a thawkte hi training chhuak thlap, sorkar in kaihhruaina a siam hrang hrangte paltlang an ni a, naupang mil tawk tura zirtirna pe thiam an ni. Mahse, kan pan leh chuang si lo.
Chu aichuan fee sang zawk leh thla tlin chawi ngai school-a dah kan uar a, fee tihsan lamah bithliah a awm lem lo niin a lang a, mimal enkawl school ho lah chuan an tisang chho telh telh mai bawk si. Nu leh pa tam tak kan rilru a hahin, kan mangang leh thin.
Sorkar enkawl school erawh chu fee chawi a ngai lo mai ni lovin, chhun chaw a dawng a, hamthatna hrang hrang a thlawnin an hmu a, an MLA ten an ngaihsak deuh phei chuan an mamawh hrang hrang a thlawnin an dawng bawk.
Nute hi naupangte tana kawng entu hmasa an nih avangin minister sawi ang hian kan fate zirna bul tan thatpui tur hian sorkar enkawl school-a dah i uar thar leh mawlh teh ang u.