Chakma Autonomous District Council 11-na (11th CADC) Chief Executive Member (CEM) atan Nilaini khan Nirupam Chakma chu Lawngtlai Bawrhsap Donny Lalruatsanga, MCS-in rinawmna thu tiamtirin a la lut.
Nirupam Chakma chuan CEM a nih angin a chakna, a tawnhriat leh a inpekna chu mipuite rawngbawlna atan a hlan vek dawn tih a tiam a ni.
CADC-a sorkar mumal leh ngelnghet tak awm tura hma latu – governor, chief minister, DCMA changtu minister leh Chakma Democratic Alliance Legislature Pary – te chungah lawmthu a sawi a. CADC-ah huapzo, langtlang leh mipui sawrkar din tura hmalak a nih tur thu a tar lang a. Hmasawnna kawng hrang hrang- zirna, kawlphetha, kawngpui tha, thalaite tana hna thar siam leh a dangte ngaih pawimawh a nih tur thu a sawi.
CEM thar chuan, “CADC chak zawk, hausa zawk leh nung zawk kan din ngei ka ring tlat a ni. Duhthlanna pakhat, thiltum pakhat leh inpekna pakhat nen thawk ho ila chakma autonomous district council tha zawk, thangtharte tan hnutchhiah turin theihtawp kan chhuah dawn a ni,” a ti.
Tun dinhmunah CADC ah hian seat 20 awmin BJP-in MDC 10, ZPM-in pakua leh MNF-in pakhat an nei mek.