Aizawl: Pachhunga University College NSS unit chuan Thawhlehni khan Civil Hospital, Aizawl tan thisen unit 158 an pe.
Blood donation camp hi Association for Voluntary Blood Donation ngenna anga huaihawt a ni a; PUC Seminar Hall-ah buatsaih niin Aizawl Civil Hospital Blood Centre-a thawkten thisen an la a, zirlai mipa 103 leh hmeichhia 55-in an pe a ni.
MZU hnuaia college-ten Zirtawpni khan academic session 2026-27 atan class an tan a, Aizawl Civil Hospital Blood Centre-in thisen an mamawhna a san avangin, AVBD ngenna angin PUC hian blood donation camp an buatsaih nghal a ni.
AVBD chuan tunlai hian Civil Hospital, Aizawl Blood Bank-ah thisen pek khawm sa, a mamawhtu damloten an lak mai theih tur a tam lo hle tih an tar lang a. Blood donation camp uar deuh deuh turin pawl hrang hrang an ngen a, holiday-ah kher ni lo, lian tham lo deuh zawk pawha uar zel a tul thu an sawi a. Pawl ang ni lo, mi mal ang pawha thisen pek uar thar zel turin Mizoram mipui an sawm bawk.