Chief Minister Lalduhoma chuan Mizoram sorkar hnuaia document dik lo hmanga family pension la mekte chu ngaihhnathiamna hun hawn chhunga anmahni duh thu ngeia bânsan (surrender) turin a ngen.
Finance department-in Nilainia dan dik lova family pension laten an pension payment order (PPO) sorkara pe kir tura hmalakna bultanna, Statewide Kick-off Programme on Sensitization of Voluntary Surrender of Pension Payment Order (PPO)’ a buatsaih a hmanpuinaah chief minister hian a sawi.
Assembly Annex Conference Hall-a hun hmanah finance minister ni bawk, Lalduhawma chuan pensioner-te hi an duhsak a, an pension benefit te, family pension te tha tak leh tluang takin la se an duh tih a sawi a. “Kan duhsak em em lai hian family pension hi mi eng emaw zatin dik lo takin an la nia hriat a ni a. A then hi chuan tum reng vangin document lem hmangin an la nia an lan laiin mi tam tak hi chuan an hriat loh vangin an lo la an ni thei bawk a. Hetianga dik lo taka sorkar sum luan raltirna hi tihtawp kan tum a ni,” a ti.
Chief minister chuan pensioner-te pension first formulation pawh an ching fel hnem tawh a, tihfel mai thei loh tam takte chu an thawhna office-a file khawihtuten training an neih that tawk loh vang a ni fo tih an hriat avangin zirtirtu tur training wing siam tumin hma an la mek tih a sawi a, “An vanglai hun zawng zawng sorkar tana hmang raltute hi kan zah a ni,” a ti.
A bultan nan mahni duhthu ngeia PPO pek kirna hun thla thum chhung an hawng mek a, document dik lo, dawt behchhana family pension laten anmahni duh thu ngeiin bânsan se an duh tih a sawi a. “He hun hawn chhunga pe kirte chu an sum lo lak tawhte kan chhuh dawn lo va, kan ngaidam dawn,” a ti.
Ngaihhnathiamna hun a ral hunah task force-ten kalchilhin an endik dawn a. Dik lo taka pension la an hmuhchhuahte chu an tihtawpsak bakah hremna pek an tum tih a sawi.
Dik lova family pension lak theihna bul hi document lem a ni thin tih sawiin document-te chu an rinhlelhawm nia an hriat chuan an chhui zel tawh dawn tih a sawi a. “Document issue-tute hi lo fimkhur se kan duh a. A tul a nih chuan kan umzui zel dawn,” a ti.
Khualzahawm Pu TBC Lalvenchhunga, Adviser to CM (Finance & Planning) pawhin pension lawmman chu sorkar sum hmanna lian ber a ni tawh tih a sawi a. “Dan ang taka miin a lak chuan kan lawmpui a, kan duhsak a, dawt leh document dik lo behchhana sorkar sum dik lo taka latute erawh chu en liam mai chi a ni lo,” a ti.
Tunah hian Mizoram sorkar hnuaiah pension benefit dawngtu hi mi 39,954 an awm a, heng zingah hian superannuation pension la mek 22,139 leh family pension la mek mi 11,194 an awm a. Pension chi dang latu – Centralised Pension Processing Centre (CPPC) kal tlanga la 5,629, voluntary 594, VRS 289, invalid 69 leh compulsory mi 40 te an awm a ni.
Sorkar chuan dik lo taka family pension latute tan mahni duhthu ngeia sorkara pek kirna hun July 1 atanga September 30 chhung a hawng mek a, mi thenkhat chuan an PPO-te an pe kir tawh nia sawi a ni a. He mi hun chhunga pe kir lote dapchhuah hna hi thawh zel a ni ang a, document lem hmanga thil tih tumna a awm zel loh nan awareness kalpui a ni bawk ang.
Hawnna hi Ramchuana, Secretary, Finance Department-in a kaihruai a ni.
Inkhawm zawhah Aizawl district-a khawtlang hruaitu, NGO aiawh leh kohhran hruaitute nen hian he mi chungchang zirhona an nei a, district hrang hrangah pawh neih zel tur a ni.