Aizawl: PHED Minister Prof. Lalnilawma’n Mizoram tlawh tura a sawm angin Israel Embassy-a International Development Co-operation (MASHAV) Senior Water Resources Specialist Neeraj Gahlawat leh Partnership & Operations Head Arpit KP-te chuan Mizoram an thleng.
Prof. Lalnilawma hian New Delhi-a a zin tumin Israel Embassy hotute nen an inkawm a. An inkawmnaah hian Mizoram tlawha Mizoram tana thawhhona kawng zawngho turin a sawm a, minister sawmna ngai pawimawhin Israel Embassy atanga mi thiamte hian an tlawh a ni.
Prof. Lalnilawma chuan Israel Embassy-te chu inkawmna hun neihpuiin thawhhona tha leh hlawhtling tak an neih ngei theih nan Mizoram sorkar chu a inhawng reng tih a sawi a. Harsatna hrang hrangte leh hmalak zel dan turte an sawiho.
Israel Embassy atanga zinte hi PHED Engineer-ten an lo dawngsawng a, Aizawl Water Supply Scheme en turin Tlawngah hruai an ni.
A hmunah hian tui supply hnathawh kalphung leh harsatna hrang hrangte an enpui a, fur laia tui lian nasa leh tui chim chin sang lutuk te, tui nu lutuk te, thal laia tui kâm nasa leh silt deposit (siltation) chungchangte sawiho a ni.