2026 FIFA World Cup chu Pathian zan khan a tawp ta a. Sum leng vel pawh kuminah hian a tam hle.
Kumin hian ram tel thei zat an tipung a, hei vang hian khawvel hmun hrang hrang atangin mi tam zawkin an en a, sumdawnna kawngah pawh hlawkna nasa zawk a thlen a ni.
Footballer-ten khelmualah chanchin thar an siam mek laiin khelmual pawn lamah pawh dollar tluklehdingawn tel a leng a, kumin World Cup atanga sum an hmuh dan hrang hrang thlir kual ila.
- FIFA
FIFA hi khawvel football thuneitu sang ber a ni a, sum an hmuh tam ber thinna chu World Cup a ni a. 2022 Qatar World Cup-ah khan $ tluklehdingawn 7.6 (Rs. vaibelchhe 760) zet a thawk chhuak a, ram 48-in United States, Canada leh Mexico-a an khelhah hian hei aia tam chu an hmuh phak a rinawm.
Deutsche Bank Research-a senior strategist Marion Laboure chuan kum li chhunga FIFA sum hmuh tur hi $ tluklehdingawn 13 a hnaih hle a ring a. “FIFA chuan an official resale marketplace hmangin secondary market-ah pawh an lut a, buyer leh seller hnen atangin 15% fee an la thin,” a t.
FIFA chuan World Cup chu ram 64 telna tura tihlen leh an ngaihtuah mek a. Chutiang thil chu a thleng a nih chuan China leh India ang chi ramte pawh inelnaah hian an tel thei ang a, chu chuan viewer leh sumdawnna kawngah nasa takin an hlawk phah dawn a ni.
- Broadcaster leh sponsor te
Broadcaster-ten tournament tihchhuah phalna lei nan sum tam tak an seng ral chungin entute an tam em avangin leh fakna lamah harsatna an neih loh avangin sum tam tham tak an la lut thei dawn a ni.
FIFA chuan kumin World Cup-ah hian tui in chawlh hun an siam a, FIFA President Gianni Infantino chuan hei hi infiamnaa thutlukna a nih thu leh governing body tan sum hmuhna hnar a nih loh thu a sawi a. Mahse, minute thum chhung tui ina an chawlh hian broadcaster leh sponsor-te tan sumdawnna kawng thar a hawng ta thung.
US broadcast rights lei nan $ maktaduai 485 sengtu, Fox Sports chuan chung chawlh hun chu ‘sponsored by’ tih nan an hmang ta a ni.
Fox Sports-ah hian FIFA World Cup advertisement spot (second 30 chhung) pakhat chu $200,000 leh $300,000 inkar a ni a. Tournament tawp lamah phei chuan US inkhelah chuan pakhat tan $750,000 thlengin a man an tisang a ni.
“Hydration break hi advertisement ti duh tan hun remchang tak a ni a, hei hi tihtawp a nih ka ring lo. Format tihlen pawh hi a la awm zel dawn a, FIFA tan sumdawnna kawng a ni ta tlat a ni,” tiin Laboure chuan a sawi.
UK-a BBC leh ITV entute erawh chuan hydration break advertisement an hmu ve lo thung a, BBC hi ad-free a nih avang leh ITV pawhin broadcasting dan avangin darkar khatah advertisement hun tlemte chauh an neih theih avangin inkhel tichhuaktu dangte ang an ni ve thei lo a ni.
- Betting company-te
2026 FIFA World Cup hi thil tihpuia inchawina lian ber a nih rin a ni a, Macquarie financial services firm-te sawi danin $ tluklehdingawn 50 zet chu sum an thap rin a ni a, vawi khat inkhelh zelah $ maktaduai 500 zet an thap dawn tihna a ni.
Sum thapnaa hetiang taka sum a luh chhan hi inelna kalhmang tihzauh vang a ni a, kum 2022-a inkhel 64 awm thin kha kuminah chuan inkhel 100 chuang a awm tawh avangin pawisa thap pawh a pung nasa hle a. Flutter Entertainment, Paddy Power, Betfair leh Sky Bet neitu chuan tournament-a sum thapnaa sum lut hi a hmaa mi aia let hnihin a tam dawn niin an sawi a, US leh Brazil-a gambling market than chhohna avangin hei hi a ni leh zual dawn a ni.
US-ah chuan sports betting hi industry naupang tak a la ni a. Kum 2018 hma chuan Nevada (Las Vegas)-ah chauh an la phal a; mahse, kum 2018-a Supreme Court thutlukna avangin US-a state tinah infiamna lama sum thap theihna kawng a hawng ta a ni.