Aizawl: Mizoram chhung hmun hrang hrangah tun chawlhkar chhung khan Mizoram Police leh a thawhpui hrang hrangte nen ruihhlo hrang hrang, Rs vbc 23 chuang man hu an man.
July 22, 2026 khan Special Narcotics PS leh Assam Rifles chuan Khatla, Aizawl-ah Heroin gram 21.330 an man a, a neitua puh R. Lalhumhima lakah thubuai ziah luh a ni.
July 17 khan CID (SB) team te chuan Aizawl-a Chanmari Kawna New Look Restaurant an dap a. Restaurant-ah hian Methamphetamine Kg 4.770, Rs nuai 382 (Rs vbc 3.82) man hu an man. Karimganj District, Assam lam mi pathum — Juber Ahmed (24), Md Sirajul Hoque (24) leh Sakir Hussain (21) te hemi kaihhnawihah hian man an ni a, dan hnuaiah thubuai siamsak an ni.
Hemi ni vek zan dar 9:40 vel khan CID (SB) Team bawk hian |huampui, Aizawla Delhi Dhaba bulah lirthei pakhat, Malsawmtluanga (29) (Zokhawthar khua) khalh atangin Methamphetamine Kg 9.016, Rs nuai 721 man hu an man leh bawk a, dan hnuaiah thubuai ziah luh a ni.
July 21, 2026 khan CID (SB) leh Kolasib DEF te chuan Khamrang khaw daiah Methamphetamine kg 15 (Rs vbc 12 man hu) an man a, he thil kaihhnawihah hian Kolasib mi pali — Sailothanga Sailo (42), S/o Lianzuala (L), Venglai, Kolasib; Lalchhuanmawia (23), S/o SR Lalnunmawia, Gosen Veng, Kolasib; Vanlalthlana (32), S/o Lalchhuanawma (L), Diakkawn, Kolasib leh Laldinpuii (43), D/o Lalrinthanga (L), Vengthar, Kolasib te manin, Kawnpui PS-ah thubuai ziah luh a ni.
Hemi ni vekah hian DSB Lunglei leh BSF te tangkawp chuan Sethlun, Lunglei-ah Heroin No. 4, gram 71.59 (Rs nuai 14.31 man hu) chu mi pahnih — Malsawmdawnga (33) s/o Zokunga (Champhai Vengthlang) leh Lalzarmawii (34) d/o F. Rotlinga (Bazar Veng, Lunglei) te kut atangin an man. Lunglei PS-ah thubuai ziah luh a ni.