Sorkar-na chelh mektu ZPM in kawng hrang hrangin hma lain, kawng tam takah chuan mipui lawmna pawh an siam nual ta.
Hetih lai hian kum thum hmel hmu tura an sorkar kal mekna kawngah hian nasa taka tawng leh nawrh khum pawh an tuar fo a, vawiin thlengin lungawi lova aukhum pawl an la awm reng bawk.
MIGAHTA ten lungawi lohna lantirin, ni hnih vanapa hall kawtah an pungkhawm tawh a, a hmain badge dum an lo bel tawh bakah, zirtir hna kalpui loh thlengin sorkar auh eih nan hma an lo la tawh a, vawiin thlengin hmasawnna an la hmu thei lo.
Kawngchhia avangin a tuartu mipui tam tak, hmun hrang hrangah an phunnawi a, sorkar lahin insawithiamna ringawt zawngin, hmalak an tum thu hriat a ni lo bawk a, hei ringawt pawh hi inenfiahna tham a ni.
Sorkar nawn zel tura an inbeisei leh inbuatsaih a nih chuan lungawi lote tuamdam hi sorkar tihtur hmasa a ni a, harsatna hrang hrang awm thei tur pawh hresa an nih miau avangin an mipui, anmahni vote tute ngei ngei leh rorelna in sanga thuttir theitute duh dan ngaihthlak hi an tihmakmawh a ni bawk.
Hun a kal a, an chet dan leh thiltih dan hi mipuiin kan vil ve reng a, kan ram leh hnam, khawtlang tana tha lo zawnga ke pen lo tur hian inzir thar zel se la, anmahni chhungkuaa buaina awm nia ngaih theih hrang hrangte hi chingfel hmasain, lungawi lote tuamdam hna thawk turin sorkar hi inbuatsaih zui mawlh teh se.