- Zirsangkima
Footballer tha leh ropui hi goal khung pup pup thei leh thiante goal khung tùr siam zung zung thiam atang chauha teh tùr ni ta se, kum riat chhúnga an ram Spain tána tum 70 zet inlan tawh chunga goal li chauh la khung, Rodri hi footballer tha leh ropui tia sawi a ni hauh lo ang. Chutiang chu tehna dik ber ni se, Ballon d’Or (2024) pawh a dawng lo anga, Euro 2024-ah “Player of the Tournament”-ah pawh an thlang lo anga; kumin World Cup khelh zawh tâkah pawh khán “Golden Ball” an pe bawk hek lo ang! Nia, tün World Cup-ah khán goal a thun lo a, a thiante pèt goal tùr pawh a siamsak hek lo!
Rodri—a hming pum, Rodrigo Hernández Cascante-a football thiamzia te; Spain leh Manchester City tána defensive midfielder tha chungchuang a nihzia te; inkhelh dàn dangdai tak leh a ball sem fin bîk thinzia te; kumin World Cup-a field lai thununtu leh tlar hnung vèn tel a thiam bîk êm avànga Spain-in goal khat chauh an chhuah dànte chu, a ngaihven îk chuan kan hre vek tawh ang. Chutiang lam chu ka sawi tum tak a ni lo a. A ball pèt khawvêl phèna a nun leh a chheh vêl khawvêl—TV leh YouTube (screen) lama kan hmuh tam loh—puanzàr phèna a nun duhawm leh mawi tak mai chanchin kan sawi zâwk ang.
𝗭𝗶𝗿𝗻𝗮 𝘂𝗮𝗿 𝗰𝗵𝗵𝘂𝗻𝗴𝗸𝘂𝗮
Rodrigo nu, marketing lama thawk Elena Cascante leh a pa, engineer Antonio Hernández te hi zirna ngai sáng mi an ni. An fapa Rodri leh a unau mipa pahnih dangte hian lehkha a zir sáng lo anga, “Thiante zínga ä fál nalh,” an tih ang an nih an hlau hle. In chhúngah pawh zirna an dah lal larh thìn.
Rodri pianna Spain khawpui, Madrid khaw daia naupang chher chhuahna kháwl tih mai tùr khawpa football zirna club tha, Rayo Majadahonda-ah kum kaw mi a nihin Rodri hian football zin kawng a zawh tan a. Kum 2007-a kum 11 mi a nihin an chhúngkaw club tan ber, Atlético Madrid academy a zawm. Naupang të a nih laiin football lamah ke pêntír mah se, Rodri nu leh pate hian, ‘Football lamah i hma lam hun hman tum mah la, zirna lamah degree i nei ngei ngei tùr a ni,’ tiin an lo hrilh dïm diam tawh.
Kum 2017-a Villarreal tána professional football a khelh laiin Spain khaw chhak lama awm, Jaume I University (Universidad de Castellon)-ah a in-admit mauh mai. Training chawlhsan chuang loin, inkhèl chungin Business Administration and Management a zir tel tlat! Hetih lai hian Villarreal senior team-ah a khèl tawh a; La Liga-a defensive midfielder tha ber zíngah a hming lam rîk a ni tawh. Mahse, an University-a zirlai pakhat ve mai a ni tih a inhre chiang a; biru tak chungin—inla profe’ viau loin lehkha a zir ve mial mial thìn.
Pro-footballer, sum pawh “nei nual tawh” ni mah se Rodri hian University hostel-ah a zirlai pui, mi 400 bàwr vêl zíngah a khawsa ve nâw nâw a. Chutin, a footballer-puite angin incheina leh gadget lam pawh a buaipui ve chiam ngai lo. Sports car man to leh changkäng tak tak pawh khalh loin, private car man tláwm chi Opel Corsa—chu pawh second hand lehnghâl a khalh ve mai thìn. Inlâk pro’-footballer viau kha tül a ti tehchiam lo chiang.
Madrilenian chhúngkaw nghet tak atanga sei lian Rodri hian a thisenah hian an hnam zung nghet takin inphúm mah se, a nu leh pate chuan in chhúngah chuan an fate zirna an dah hmasa ber a; tlàwmna nun, dikna leh mi dang nèna inzah tawnna tuh nghehsak an tum tlat bawk. Hei hian vawiina kan hmuh Rodri-a nuna “hmunawm” hi a rawn hring chhuak tih a chiang hle.
Spanish-ho hi Sap tawng (English) ngai sáng viau lo tak hnam an ni a. Hetih lai hian Rodri pa erawh hi chuan a fapa chu naupang të a nih lai atangin football chauh ni lo, Sâp tawng a thiam theih nán America leh Ireland-ah te exchange programme hun hmang tùrin a thawn fo a. Hei vàng hian kum 2019-a Spain atanga England (Manchester City) a pan pawh khán, mahni tawng ngai sáng ve tak chhùl chhuak Rodri hian tawngah harsatna eng mah a nei lo.
𝗧𝗮𝘄𝗻 𝘁𝗵𝗮𝗿 𝗱𝗶 𝘁𝗮𝘄𝗻𝗻𝗮
Hetih hun lai, University hostel-a a awm lai hian, vawiin thlenga a kawppui, a bialnu la ni ta ngar ngar—daktawr zir tan ve chiah, Laura Iglesias chu an University-ah hian a tawng ta chat mai le! Laura hi mahni mimal nun thup duh mi, páwn lam boruak ngaina lo tak, mi ti zawk zawk lo leh mi zínga inlàr tam nuam ti miah lo mi a ni.
‘Kan intawn tirh phat khán, “He pa hi! He lai laiah te eng nge maw a rawn tih ve le?” tih melh takin min melh a. Khatih lai khán professional football-a hma ka sâwn chhoh lai, Villarreal tána ka khelh lai a ni a. Nia, a tìr chuan a zakzum khawp mai a. A chhan ni ber zâwka chu, mi sawi kan kai anga, kan lär hluai ang tih kha a hlau tlat a ni,’ tiin Rodrigo chuan a tawn thar di, Laura nèna an intawn tan lai boruak a sawi. Tute emaw anga an bialnu tharte nèna an thlalâk, tabloid leh social media lama duh aia tam hmuh tùr awmho ang kha chu an ni ve lo a ni ang!
𝗛𝗻𝗮𝘄𝗹𝗻𝗮 𝗹𝗲𝗵 𝗵𝗮𝗿𝘀𝗮𝘁𝗻𝗮 𝗸𝗮𝗿𝗮𝗵
Lêt leh lawk ang. Kum nga chhúng ball pèt a lo zir ve tawhna, an chhúngkaw club tan ber thin Atlético Madrid chuan kum 2013 khán Rodri hi an academy atangin an lo chhuahtír tawl tawh! “A taksa a chak tâwk lo a, a sáng tâwk lo a, a pa lian lo bawk,” tih chu an chhuanlam a ni. Tlàwmthlâk ngâih ngâih tak a ni!
Hmasâwnna beiseiin an khua Madrid chu mittui nèn chhuahsanin Villarreal Juvenil (Villarreal junior team) a zawm a. Villarreal-a a awm lai hian Rodri hian harsatna a tâwk leh. Villarreal Juvenil tán a khèl tan ve a; mahse, minute tlém të bâk field-ah an luhtír ngai lo. A taksa chak tâwk lohna leh a pa len lohna bawk chu an hotute thu sawi a ni leh chiah. Amahah hmasâwnna êm êm hmuh tùr a tam lo hle bawk. Tin, in lam ngaiin a lungléng êm êm thìn a; Madrid lama a chhúngte leh a thiante ngaiin a kúr duai duai fo.
Zan khat phei chu Rodri chuan tap chungin a pa chu telephone-in a bia a. A lo suangtuah thin leh a thlen châk ber, alo lo dream ve reng thin a tàwp tâk thu a pa a va hrilh tawl mai a nih chu! Mahse, a pa, Antonio chhànna chuan engkim a thlâk danglam ta vek mai. ‘Tap chunga phone-a ka pa ka biak zàn kha ka la hre reng. Engkim a tàwp ta nia ka hriat thu ka va hrilh a,’ tia sawiin Rodri chuan, ‘Ka pa chuan, “Hei leh chen hi kan thleng tawh a, kan tláwm mai tùr a ni lo,” tiin min lo hrilh a. Khä a mi chhànna khân ka rilru put hmang a thlâk danglam ta vek a ni,’ a ti bawk.
A pa thu sawi chuan awmzia a nei chiang e—Villarreal-a a chàm chhúng hian a taksa pawh a rawn insiam puitling chho zêl a; feet 6 leh inchi 3 laiin a thang hman nia! Beidawng duh loa a beih tàng tângna rah a seng zêl a. A taksa than kawngah chauh hma a sâwn lo a, ball thiamna, game chhiar thiamna leh tactical discipline a rawn nei tha chho zêl bawk. Villarreal first team-ah a rawn inpét kai ta hial. Spanish midfielder ropui, Barcelona chhuan tawlawl, Sergio Busquets aiawh thei tùra ngai an kat nuk ta mai! La Liga-a midfielder langsàr berte zínga pakhatah a rawn chhuak ta hial a ni.
𝗛𝗻𝗮𝘄𝗹𝘁𝘂𝘁𝗲𝗻 𝗮𝗻 𝗸𝗼 𝗹𝗲𝘁
Hetah chiah hian a ni, Atlético Madrid lama academy director te leh an manager, Diego Simeone te chuan an thil tih sual lian tak an hriat chhuah ve chauh ni! Midfielder vawi leh khata rawn puitling thut, taksa chak leh sáng bawk si, game chhiar thiam khawpa fing bawk si—an naupang hlui Rodri an hmuh chuan an hnâwl hnu a ni tih pawh ngaihtuah hman loin lak kìr dàn an ngaihtuah ta chung chung mai!
December 2017-ah Villarreal nèn inbiakna neiin Atlético chuan euro mtd. 20 (plus euro mtd. 5) vêl séngin Rodri chu Madrid lama seng lût leh tùrin a thu phungin an inrem a. A kum leh, 2018-a nipui transfer window hawn a nih rualin a tan ber club lamah Rodri chu a kïr leh ta a ni.
A kìr leh tum hian, ‘Nia … naupang të ka nih lai khán ka taksa than chak loh avàngin ka chhuak a; mahse, Pathian zárah ka tlin lohnate kha ka bei lêt a; Gabi (Gabriel Fernández; Atlético Madrid captain leh legend; 2018-a Rodri a kìr khán Al-Sadd club, Qatar a pan) aiawh thei tùra ka club hmangaiha ka kïr leh thei hi nuam ka ti tak zet a ni,’ a ti. “I hlutna hre lotu hnên atangin chhuak la; a hnuah a aia hluin kïr leh rawh,” tih thu dikzia hi, Rodri hian a va nemnghet chiang êm!
𝗛𝗹𝗮𝘄𝗵𝘁𝗹𝗶𝗻𝗻𝗮 𝗵𝗺𝗮 𝗵𝗿𝘂𝗮𝗶
Atlético-a a kìr leh kum hian UEFA Super Cup 2018 final-a Real Madrid an hnehna match-ah Rodri hi a khèl nghâl a; trophy a chawi nghal ringawt! Atlético-ah hian match 47 a khèl a. Simeone-a hnuaiah a defensive instinct leh tactical discipline te kha a rawn hmang chho tak tak a; La Liga-a pass hlawhtling nei tam ber leh ball vawrh chhuak hnem berte zínga mi a rawn ni chho ta. Season khat chhúng leka a game hmuhnawm tak avàngin khawvêla manager ropui ber berte mit a rawn tlung nghâl hle a. Chûng zíngah chuan English Premier League-a lal lèna léng chho mék, Manchester City manager Pep Guardiola pawh a bäng lo. A hnua an indàwr dàn leh City tána mi pawimawh a nih chhoh dàn chu … football tuipui chuan kan hre vek e.
𝗥𝗼𝗱𝗿𝗶 … 𝗴𝗼 “𝗡𝘂𝗻𝗺𝗮𝘄𝗶𝗮”—𝗚𝗼! 𝗚𝗼! 𝗚𝗼!
Villarreal-a a chàm laia euro 3,000 a lo khâwl vea a car hmasa ber, Opel Corsa second hand a lei tum khán a teammate-te chuan sports car an khalh deuh vek tawh; mite nuihzat pawh a tâwk nasa. Mahse, chûng nuihsawhnate chu Rodri chuan a ngaithla duh ngai lo a, hnawmhnêah a ngai hmiah zêl. A pa khân páwn lam lang thei màwina aiin chhúng lam hlimna leh phùrna a pawimawh zâwkzia a lo zirtír tawh tlat a. Vawiina Range Rover a khalh ve tâk hnu pawh hian, a nu leh paten an lo zirtír tawh, tlàwmna nun a la vawng nung reng a. A teammate mai ni lo, coaching staff te paw’na an zah rawn player a ni thei tlat. World champion hian social media a hmang lo a; a taksaah tatoo inchhu a awm hek lo.
Nu leh pate thu awih Rodri hi, hliamin ti buai fo mah se, hma lam panin kal zêl se, “Rodrigo … Go! Go! Go!” tia duhsakna hlan hi a phu hliah hliah e.