India-a eibar dinhmun chu Covid-19 len hnuah 7% leh a chung lamin a thang zel a, kuminah pawh khawvel pumah harsatna neuh neuh awm mah se a than dan ngaia a than beisei a ni tih Union Finance Minister Nirmala Sitharaman-i’n a sawi.
Chicago, US-a Indian awmte hmaa Pathiannia hun a hmannaah Sitharaman-i chuan India chu hripui leng avanga harsatna atangin ‘tha takin a dam chhuak’ tih sawiin a thanna chu 7% leh a chung lam a ni reng tawh tih a sawi.
Kuminah ngei pawh indona avanga khawvelin harsatna hrang hrang – chhiah inlaksakna sang, Strait of Hormuz kaltlanga energy leh lei tha lak leh phurhna buai karah pawh a dinhmun ngai a luah leh dawn niin a sawi a. “Kan rilru-ah Covid kan kal pelh khan harsatna lian tak kha kan kal pel ta niin kan inngai,” a ti.
“Kuminah ngei pawh kan thanna hi a gai a ni dawn,” a ti bawk.
Finance minister-in hetiang a sawi mek lai hian Reserve Bank of India-in kum kal meka Indian economy thanna tur a chhut lawkna thar ber, August 5-a a tihchhuahah erawh tlemin thanna a chhe deuh dawn a. 2026-27 chhunga sum thawh chhuah zawng zawng, gross domestic product (GDP) thanna chu 6.7% ni turin a chhut lawk.
RBI hian GDP thanna tur zat bi a chhut hi June thlaa a chhut lawk aiin a sang hret zawk.
Sitharaman-i chuan khawvel pumah energy leh lei tha phurhna buai mah se Indian sorkar chuan a khua leh tuite a hum tlat niin a sawi a. Hormuz-a harsatna awm chu ‘chona lian tak’ a ni chungin India chuan lo neituten lei tha an mamawh an tlakchham loh nan eng anga man tam pawh ni se a ngaihtuah a, energy pawh in tinin an chat lak loh nan tan a la reng tih finance minister chuan a sawi.
India hian lei tha a hman zawng zawng zinga 80% dawn hi Hormuz kal tlanga a lak luh a ni a, heng zingah urea, diammonium phosphate (DAP) leh potash te pawh a tel niin a sawi a. Buaina a awm takah khan Indian lo neituten an tlachham a; mahse, sorkarin kawng dang dapin a la lut a, tunah chuan ‘mamawh tawk’ a awm thu a sawi.
US-a Indian-te hnenah hian Sitharaman-i chuan ram changkanga India siam turin sorkarin ngaihtuahna tam tak a seng a, hma a la reng tih a sawi bawk.
Kum 2047 chu Viksit Bharat tihhlawhtlin kum tur a ni tih a sawi a. “Tun atangin kum 20 hautak tak a la awm a. Chak taka kal turin thlawpna tam tak mamawh a ni a. Thiamna nei thate thawpna leh inpho chhuak theite mamawh a ni a. Hma lam min panpui theih ngaihdan neite thlawpna mamawh a ni a. Heng zawng zawng bvakah hian ram hian a mamawhtute hman tur sum a mamawh a ni,” a ti.