Aizawl: Mizoram sorkar hrawn mek chu economic policy rintlak a neih loh leh sum enkawl hlawhchham avangin ram chhungah sum lengvak a vang hle a ni tiin Mizoram Pradesh Congress Committee (MPCC) Sr. Vice-President Lalnunmawia Chuaungo chuan Zirtawpnia an Party Political Session-ah a sawi.
Congress Bhavan-a inkhawmah thu sawiin Lalnunmawia Chuaungo chuan, state budget kum 2017-18 a Rs vbc 8,803.10 vel ni thin chu kum 2026-27 ah Rs vbc 17,469.91 a tling tawh chung pawha dawrkaite leh mipuite kuta sum a vang em em si hi sorkarin Restricted Tender leh Departmental Work hming hmanga duhsak zawng mi tlemte hnenah hna lian tham zawng zawng a sem chin avanga vantlang sum tlak dan a rual loh vang ni a sawi a; Congress party-in rorelna fawng an vuan leh ngei a nih chuan, ram leh mipui hmasawnna tur economic policy tha zawk an kalpui tur thu a sawi.
Lalnunmawia Chuaungo chuan sorkarin Mizoram Universal Health Care Scheme (MUHCS) a kalpui dik loh avangin mipuite sum tam tak vai ramah a luang ral a, Preferential Procurement Policy kalha thil an kalpui avangin thalaite tana hna thar siamna leh sum vir vel thlengin nasa takin a pawt chhia a ni, a ti bawk.
He hunah hian ZPM Secretary thin Nangsianmunga chu Congress Party-ah lawmluh a ni a, VC By-Election-a Congress atanga tling tharte hnenah lawmpuina certificate hlan nghal an ni.