Aizawl: Education Minister Dr. Vanlalthlana chuan Ningani khan Gandhinagar, Gujarat-a Vidya Samiksha Kendra (VSK) leh New Age Makers’ Institute of Technology (NAMTECH) tlawhin, Mizorama zirna leh technology thlun zawma tihchangtlun a nih theih nan leh hma thar lak a nih theih nan Gujarat sorkara education department hotute a kawm.
VSK hi India-a zirna in, zirtirtu leh zirlaite vilna leh tihhmasawnna atana Gujarat sorkar buatsaih leh hlawhtling taka a kalpui hmasa ber a ni a. Minister leh Samagra Shiksha official-te chuan he VSK a taka kalpui a nih dan an zir chiang a ni.
Minister chuan Mizoramah pawh technology hmanga zirna kawng tihhmasawn a nih mek thu leh Gujarat tih dan tha zawng zawngte pawh Mizoram mila her rem tura hman ve a beisei thu a sawi a, Gujarat sorkar hotute pawhin Mizoram tih dan tha te entawn an tum thu an sawi ve bawk.
Hemi ni vek hian Dr. Vanlalthlana hian NAMTECH tlawh nghalin, hun rei lo tea class kalpui tan mai tur Mizoram Engineering College (MEC) chuan tun lai mil zirna a kalpui theih nan leh zir chhuakten industry mamawh thiamna an neih nghal theih nan thawhpui turin a sawm a, NAMTECH hotute pawhin Mizoram sorkar nen thawk ho tura an inhawn reng thu an sawi.
Gandhinagar a cham chhung hian Minister hian IIT Gandhinagar-a Mizo awmte a tlawh nghal bawk.