Japan-a kum 100 leh a chung lam awmzat chu a vawi khat nan 1,00,000 an tling niin health ministry-in a sawi.
An chhinchhiah dan chuan Japan-ah hian ventenarian 107,677 an awm a, khawvela an tamna ber niin 88% chu hmeichhia an ni a. An zinga upa ber chu kum 114 mi, Kishimoto Fuyo niin Kyoto City-a mi a ni a. Mipaa a upa ber chu kum 112 mi, Kato Hikaru, Kumamoto-a mi a ni.
Health Minister Kenichiro Ueno-a chuan damdawi leh technology avanga ‘mi tam tak an dam rei a, an hrisel a, an la chakvak’ chuan a tilawm hle tih a sawi a. Hetih rual hian an ramin a hmabak ni thei chu khawtlanga himna rintlak a nih thu a sawi bawk.
Mi thiamte chuan Japanese-te dam rei chhan an chhut zingah thil hrisel inbuk tawka an ei leh an nunphung dik chu niin an sawi thin.
Thliarkar ramah hian an ei ber chu sangha, thlai leh buh niin khawthlang lama mite angin thau lam thau sawrfu hnu an ei tam ve lo.
Upate hi an kal a, vantlang inkalpawhna hmanrua an hmang a, thirsakawr an khalh a, an la zirmar peih reng hlawm a ni.
Japan-ah hian tun hma lam atang tawhin upa an tam avangin kum tam tak chhung chu nau ek dawmna aiin upate ek dawmna hralh a kal zawk ngar ngar a ni.
Company-te pawhin upate tan thil thar an duang chhuak a, heng zingah an taksa peng hrang hrangte chetna tur pui thei tur, powered exoskeleton leh tarmit, amah (automatic)-a focus siam thei ang chite pawh a tel.
Mihring awm mekte inthlak zel turin hmeichhe pakhatin chawhrualin fa 2.1 hrin an mamawh a, nikum khan 1.14 chauh niin a hniam ber kum a ni.
Mihring cheng zat hi kum 2070-ah chuan maktaduai 87-ah an tla hniam dawn a, kum 2008-a an tam lai ber kkhan maktaduai 128 awmin 30% velin an tling tawh dawn lo niin National Institute of Population & Social Security-in a chhut lawk.
Mi cheng zinga 30% vel chu kum 65 leh a chung lam niin hei hi 2070-ah chuan 40% dawn a tlin rin a ni bawk.
Japan-ah hian kum 100 tling chin chhiarna hi kum 1963 khan tanin 153 an awm a. Kum 1981-ah 1,000 tlingin 1998 khan 10,000 an kai leh a, tunah 1,00,000 an kai ta a ni.
Japanese thuneitute chuan an kal dan chu ngaihthatthlak loh an ti a. Nikum khan prefecture 47 an neiha pahnih tih lohvah mihring cheng zat an tlahniam vek a, an tlakhniamna zat bi hi a sang zawng zelin a kal bawk.
Sorkar chuan thalaiten fa tam zawk an hrin theihna turin programme leh thil dang dang a duang a, pian pun lamah erawh rah tha a la chhuah tak tak thei lo.