Aizawl: AMC chuan a huam chhunga chenna in, sumdawnna hmun, sorkar pisa leh NGO office-te a hmangtu mila septic tank (with soakpit) vawng thianghlim vek tura hriattirna chhuahin thupek zawm lo leh tuichhia mumal lo taka luantirtute lakah dan angin hma lak a nih dawn thu a tar lang.
Aizawl hi Open Defecation Free Plus (ODF+) dinhmuna hlankai tawh a nih avangin, septic tank rimchhia leh enkawl that loh avanga mi mal leh vantlangin harsatna an tawk a nih chuan Section 155 & 164 of the Mizoram Municipalities Acts, 2007 (As amended in 2015) hmangin hma lak a ni ang. Ruahmanna hi chenna in tin bakah market, mall, hotel, hostel, home-stay, restaurant, tea-stall, zirna in leh NGO pisa hmun hrang hrangte tana hman tur a ni.
Hei bakah tuichhia leh in chung tuite pawh mi mal leh vantlang tana harsatna thlen theia kawngpuia luantir emaw, mumal lo taka paih chhuak an awm a nih chuan dan bawhchhiatna a nih avangin a hremna dan hman zui a ni bawk ang.