Aizawl: Pathianni zan thim hlima Kolasib district chhunga Bualpui Coffee huan bula intihbuaina thlenga mi pakhat a thih avangin Kawnpui Police-te chuan mi pakua an man tawh a, man belh tur pawh an la awm rin a ni.
Thu dawn danin, Bualpui Coffee huan bul kawngpuiah Kolasib lam pana tlan truck leh Kawnpui lam pana tlan picnic haw lam an intibuai a. He intihbuainaah hian Kolasib bul New Builum mi, Zakaria Lalhriattluanga a thi a ni.
Zakaria Lalhruaitluanga hi Assam Regiment niin, Pathianni khan chawlh hmang turin a haw a, hei hi a thianpa load la zo haw lam chuan a lirthei, truck-in Lengpuiah hian a lo hmuak a, hetia an haw hi Pathianni tlai dar 6 pelh hnu khan Bualpui daiah hnam dang lirthei lian khalh nen intawkin, he hnam dang lirthei hi a side lo lama tlan a nih avangin Zakaria-a thianpa hian a lirthei atanga chhukin a hau a, hnam dang lirthei khalh hnunga tlan Kawnpui Hmar Veng tlangval rual, mi 20 atanga 30 vel, pick-up leh scooter-a inphurte chuan Zakaria thianpa hi an khawih rawn nghal ta mai a, Zakaria pawh intibuai thelh tuma a chhuk chu lo khawih rawnin, Pathianni zan dar 6:20 vel khan an intihbuaina hmunah hian a thi a ni.
He thihna avangin Police-ten mi pakua an man tawhte zingah hian hmeichhia pawh an tel nia sawi a ni a, mi dang inhnamhnawih pawh man belh tura zawn mek an ni.
An mi mante hi Police custody-ah awm mekin thuzawh fiah mek an ni a, Kolasib District Court-a hruai an nih hnuah District Jail-ah dah nghal an ni dawn a ni.
Zakaria Lalhriattluanga ruang hi Pathianni zan vek khan Forensic department, Aizawl ten an enfiah hnuah zanlai dar 12 khan an chenna in thlenpui a ni a. Lumen a nih hnuah nimin khan postmortem a ni a, chumi hnuah sipai chawimawina famkim nen vui a ni.