Aizawl: ZPM President thar leh Chief Minister Lalduhoma’n party inkhawma a thusawiah Pathian leh Isua chanchin a sawi dan chu kohhran zirtirna leh thurin palzutna dik tak a nih bakah, kohhran upa a nihna hlihsakna tham a ni tih Mizoram Pradesh Youth Congress Committee (MPYCC) chuan an tar lang.
An thuchhuahah MPYCC chuan, Thawhtannia ZPM chhung inkhawmah Lalduhoma hian an party kal dan sawimamna atan ‘Pathian meuh pawhin thuthlung a thlak fo thin a, Lal Isua ngei pawhin ngaihdan a thlak fo bawk’ tia a sawi chu pawi an tih thu an sawi a. Congress |halai chuan Kristian state-a ram hruaitu lu berin hetiang thil a sawi hi India rama Kohhran hrang hrang thurin leh Presbyterian Kohhran thurin pahnihna — Pathian chu a mizia leh a nihnaa danglam ngai lo a ni tih inzirtirna kalh tlat a ni, an ti.
Party pakhat President dinhmun inthlakthleng sawifiah nana hetianga Pathian hming hman hi Kohhran Upa a nihna nen pawh thil mawilo tak leh Kohhran kalhmanga Pathian hmuh dan nen a inperhsan hle tih an sawi bawk.
MPYCC chuan ZPM MLA candidate-te’n Pathian leh mipui hmaa chhechham meuhva intiamna an siam tawhte an bawhchhiat fai vek tak avangin, insawimam nan Kohhran zirtirna leh thurin kaihlek zawngin Chief Minister hian thil a sawi ta mai nia an ngaih thu an tar lang a. ZPM sorkar hnuaiah an sakhua, ram leh hnam an him lo hle tih a lang chiang, an ti a, he thil thleng avang hian a rang thei ang bera Kohhran leh mipui hnena ngaihdam dil turin MPYCC chuan Lalduhoma hi an phut a ni.