Aizawl: Ram leh hnam neitu thinlung pu party an nih tlat avangin a chhiat a thatah mawh an inphurhtir ngam a ngai tih MNF Treasurer Lalruatkima chuan a sawi.
He thu hi Thawhlehnia Thuampui YMA Hall-a Aizawl East I Block MNF party tlawhchhuahna puala hun hmanah a sawi a ni.
Lalruatkima chuan MNF sorkar lai khan Mizoram hmun tam takah hmasawnna an thlen thu sawiin, East I bialah phei chuan kuthnu a thahnem hle tih a sawi a. Tunah eptu lamah thu rih mah se, rorelna dinhmun an chelh leh hun hi reiloteah a lo thleng thuai dawn tih sawiin, chumi atan chuan kil tinah theihtawp chhuah a tul a ni, a ti.
Mipui rilrem zawng leh ngainat zawnga inherrem zelin, hnam nun mawi chawisang zel tlat mi an nihna an lantir a tul a ni tiin, “MNF sorkar leh hunah chuan MNF kuthnu chu a tha bik, a tlo bik, ro a tling bik zel tur a ni. Belhchian dawl hnathawh Zoram mipuiiin an hmu tur a ni ang. Kawng tha bik, zirna changtlung zawk, hriselna kawngah inenkawlna tha zawk, ei leh bar hniang hnar zawk, gas awlsam zawk a thleng ngei tur a ni,” a ti bawk.
Robert Romawia Royte, MLA, NCC, MNF & Ex-Minister pawhin thusawiin MNF chu hnam party leh Mizo mipuite tana ding ngam a nih avangin leh malsawmna ni tura awm a nih avanga zawm an nih thu a sawi. Sorkar kal mek kalphung chhia leh mak tak mipuite’n an hmuh zel avangin MNF-te hmabak a eng a ni tiin, dawt hmanga Lalduhoma leh a hoten MNF an puhna chu thudik hmangin an chhang zel dawn tih a sawi.
Minister hlui leh MNF General Secretary Er. Lalrinawma pawhin thu a sawi a ni.