Aizawl: Chief Minister Lalduhoma kaihhruai sorkar chu a kawng bo hle tiin, mipuiten kalphung thara kal tura an inpeih em em laiin ZPM sorkar zawk chuan he kalphung thar hi a tlin lo zawk nia a lan thu MPCC Vice President Zodintluanga Ralte chuan a sawi.
He thu hi Chhinga Venga Congress party unit hrang hrang intuaitharna Chhinga Venga neih a hmanpuinaah sawiin, Zodintluanga Ralte chuan kum 2023 inthlan hma khan Lalduhoma’n chief minister-in party president nihna a kawp a rem lo va, thuneihna insem zai kalpui a tiam thu sawi mah se, tunah erawh ‘Pathian pawhin a thuthlung a thlak thin’ tia inthiam chawpin, thuneihna a pumbilh zui ta vek tih a sawi.
MPCC Vice President hian Lalduhoma chu Mizoram chief minister zinga ama lim hawng hmasa ber, Mosia anga intehkhin hmasa ber leh cabinet meeting-a Isua nen intehkhin hial a ni tiin a sawi bawk.
Aizawl East II biala hmasawnna ruhrel lian – Dawrpui Multipurpose Centre, Saron Veng Indoor Stadium, Armed Veng Basketball Indoor Stadium leh Chhinga Veng kawrpui siamthat thlengin Congress sorkar laia din a nih thu sawiin, “Congress hnathawh kan theihnghilh zah hi ZPM sorkar hian an la thawk lo tih ka sawi ngam,” a ti bawk.